Eyjólfur Ármannsson, samgöngu- og sveitarstjórnarráðherra, flutti opnunarávarp á Útboðsþingi Samtaka iðnaðarins á Grand hótel í gær. Í ávarpi sínu sagði Eyjólfur að ríkisstjórnin hafi kynnt skýra stefnu um kraftmikla uppbyggingu samgönguinnviða um allt land. Hann sagði uppbygginguna ekki aðeins fjárfestingu í samgöngukerfinu heldur í framtíð landsins. Góðar samgöngur stuðli að aukinni velmegun og bættum lífskjörum. Þetta kemur fram í tilkynningu á vef Stjórnarráðsins

Samtök iðnaðarins hafa haldið útboðsþing árlega síðan 1997 en þingið var nú haldið í samstarfi við Mannvirki – félag verktaka og Samtök innviðaverktaka. Á þinginu kynntu fulltrúar opinberra aðila fyrirhugaðar verklegar framkvæmdir á árinu sem fara í útboð.

Í ávarpi sínu sagði ráðherra verk að vinna. „Greiningar ýmissa aðila undanfarin ár hafa staðfest að fjárfestingarþörf í íslenskum samgönguinnviðum er mjög mikil. Fólkið í landinu upplifir þetta á ferðum sínum á hverjum degi. Það er sama hvort um er að ræða samgönguinnviði á landsbyggðinni eða á höfuðborgarsvæðinu, jarðgöng eða viðhald vega. Alls staðar er brýn þörf,“ sagði Eyjólfur.

Fyrsta verk að ná stöðugleika

Eyjólfur sagði fyrsta verkefni ríkisstjórnarinnar vera er að ná stöðugleika í efnahagslífi og lækkun vaxta, með styrkri stjórn á fjármálum ríkisins. „Opinberir aðilar þurfi því að sýna festu fyrst um sinn. Það væri forgangsmál og grundvallaratriði,“ sagði hans.

Ríkisstjórnin hyggist samhliða fjárfesta í innviðum til að auka verðmætasköpun. Til að ná þeim markmiðum verði að auka fjárfestingar í samgöngum og hefja kraftmiklar framkvæmdir um land allt. „Til lengri tíma litið horfum við til risaverkefna sem munu móta framtíð íslensks samfélags. Þar stendur upp úr bygging Sundabrautar, verkefni sem mun auka umferðarflæði og stórbæta vegtengingar til og frá Vestur- og Norðurlandi og innan höfuðborgarsvæðisins. Hér er um að ræða þjóðhagslega hagkvæmustu framkvæmd Íslandssögunnar,“ sagði Eyjólfur í ávarpinu.

Rjúfa kyrrstöðu í jarðgangagerð

Eyjólfur vék einnig að jarðgöngum í ávarpi sínu. „Við ætlum að rjúfa kyrrstöðu í jarðgangagerð hér á landi. Víða á landinu geta jarðgöng gerbreytt búsetuskilyrðum, tengt saman og eflt samfélög, leyst af hættulega vegi og eflt atvinnulíf og aukið verðmætasköpun. Jarðgangakostir eru margir hér á landi og mörg sveitarfélög sem binda miklar vonir við þau. Það eru því miklir og brýnir hagsmunir fyrir því að jarðgangagerð komist aftur af stað og að við getum grafið ein jarðgöng á hverjum tíma.“

Ráðherra sagði einnig mikilvægt að huga að viðhaldi vega: „Við ætlum að tryggja að viðhald innviða sé nægilega kröftugt svo þeir haldi virði sínu, séu öruggir og geti sinnt því hlutverki sem þeim er ætlað. Og tryggja þannig greiðar samgöngur bæði fólks og farms allt árið um kring. Góðar samgöngur stuðla því að aukinni velmegun og bættum lífskjörum.“

Þá verði áfram lögð áherslu á að efna samgöngusáttmálann á höfuðborgarsvæðinu með því að byggja upp skilvirkara samgöngukerfi. Miklar umbætur verði gerðar á stofnbrautum borgarinnar, svo sem með tilkomu Miklabrautarganga og Sæbrautarstokks. Einnig verði byggt upp almenningssamgöngukerfi og fjárfest í innviðum fyrir gangandi og hjólandi.

Þrjár leiðir við fjármögnun

Eyjólfur sagði að þegar kæmi að fjármögnun mætti líta til eftirfarandi þriggja leiða.

• Fjármögnun að fullu með fé af fjárlögum.
• Fjármögnun að hluta af fjárlögum og að hluta frá sveitarfélögum. Þetta geti meðal annars átt við um hafnarframkvæmdir, sem og einnig verkefni Samgöngusáttmálans.
• Fjármögnun samkvæmt lögum um samvinnuverkefni um samgönguframkvæmdir. Samvinnuverkefni eru þau verkefni þar sem einkaaðili annast fjármögnun opinbers mannvirkis, í heild eða að hluta.

Ráðherra sagði loks vel koma til greina að leita fyrirmynda um fjármögnun bæði í Noregi og Færeyjum. Færeyingar hafi lært af okkar varðandi fjármögnun Hvalfjarðarganga, sem opnuð voru fyrir nærri 27 árum. Nú væri kannski kominn tími til að við lærðum af þeim.