Landeyjahöfn verður ekki opnuð fyrir páska. Í sameginlegri tilkynningu frá Siglingastofnun, Vegagerðinni, Eimskipafélaginu og Vestmannaeyjabæ kemur fram að siglingar Herjólfs um páskana verði til og frá Þorlákshöfn. Ekki verði hægt að sigla í Landeyjahöfn vegna veðurs og ölduhæðar. Dýpi er ekki tilgreint sem ástæða í tilkynningunni en dæling úr höfninni hefur gengið ágætlega undanfarið þó aðstæður hafi verið erfiðar. Það er hins vegar spáð sunnanhvassviðri og mikilli ölduhæð á sunnudag og mánudag og því hefur það verið slegið af að opna Landeyjahöfn.