Ísfisktogarinn Bergey VE landaði fullfermi í Grindavík á mánudag og er að landa í Vestmannaeyjum í dag. Systurskipið Vestmannaey VE landaði fullfermi í Eyjum í gær. Heimasíða Síldarvinnslunnar ræddi við skipstjórana og fékk fréttir af veiðunum. Jón Valgeirsson, skipstjóri á Bergey, segir lítinn kraft vera í veiðunum um þessar mundir.

„Þetta er óttalegt rag. Við lönduðum fullfermi í Grindavík á mánudag og aflinn var mest þorskur og ýsa. Við hófum túrinn í Reynisdýpinu, síðan var haldið á Pétursey og Vík, þaðan var brunað á Ingólfshöfðann og endað í ýsu í Meðallandsbugtinni.“

Seinni túr Bergeyjar var stuttur og er skipið að landa 35 tonnum í Eyjum í dag. „Sá afli fékkst á Pétursey og Vík,“ segir Jón.

Egill Guðni Guðnason, skipstjóri á Vestmannaey, segir að veitt hafi verið í einmunablíðu. „Við lönduðum fullfermi í gær og aflinn var jöfn blanda af þorski, ýsu og ufsa. Aflinn fékkst á Síðugrunni og Ingólfshöfða. Veiðin var alveg þokkaleg en engu að síður svolítið blettótt,“ segir Egill Guðni.