Eyjamenn klóra sér í hausnum þessa dagana. Upphaflega þegar dæluskipið Skandia var fengið til dýpkunarframkvæmda gaf Siglingastofnun út að einn dag, í mesta lagi þyrfti tvo, til að opna höfnina. Síðar breyttust þessir tveir dagar í 4-5 daga og nú, eftir að ölduhæð við Landeyjahöfn hefur verið undir tveimur metrum í rúma sjö sólarhringa, er höfnin enn lokuð. Sigurður Áss Grétarsson, hjá Siglingastofnun segir að sandmagn hafi bæst við frá því í janúar og þar til Skandia hóf að dæla upp sandi við Landeyjahöfn.