Útlit er fyrir að halli á rekstri Náttúrustofu Suðurlands verði meiri en fjárhagsáætlun gerði ráð fyrir. Lægra framlag ríkisins og meiri launakostnaður hafa áhrif á reksturinn.

Bæjarráð Vestmannaeyja fór yfir stöðu Náttúrustofu Suðurlands á fundi sínum í síðustu viku. Fram kom að framlag ríkisins til stofnunarinnar væri lægra en gert hafði verið ráð fyrir. Hlutur Vestmannaeyjabæjar skerðist í samræmi við það.

Þá stefnir launakostnaður í að verða meiri en áætlað var, meðal annars vegna rannsóknarverkefna sem byggð voru á áætluðum framlögum. Fyrirséð er því að rekstrarhalli Náttúrustofunnar verði meiri en gert var ráð fyrir í fjárhagsáætlun.

Bæjarráð þakkaði fyrir upplýsingarnar og ítrekaði mikilvægi þess að stofnunin haldi rekstri sínum innan fjárhagsramma hvers árs. Ekki kemur fram í bókuninni hversu mikill hallinn er talinn verða, hversu mikið framlag ríkisins lækkaði eða hvaða rannsóknarverkefni um ræðir.