Ný stjórn og starfsfólk Samtaka sunnlenskra sveitarfélaga (SASS) komu saman til vinnufundar á Sveitasetrinu Brú í Grímsnesi á dögunum. Þar var farið yfir helstu verkefni komandi starfsárs og áherslur samtakanna á nýju kjörtímabili.

Fram kemur á vef samtakana að fundurinn hafi markað formlegt upphaf samstarfs nýrrar stjórnar og starfsfólks SASS. Meðal þess sem rætt var um voru stefnumótun landshlutans, Sóknaráætlun Suðurlands, stofnun sunnlensks sveitarstjórnarskóla og undirbúningur ársþings samtakanna.

SASS er sameiginlegur vettvangur sveitarfélaganna 15 á Suðurlandi. Á fundinum var farið yfir hlutverk samtakanna og helstu samstarfsverkefni, þar á meðal Sorpstöð Suðurlands, Eignarhaldsfélag Suðurlands og starf ART-teymisins.

Sóknaráætlunin í forgrunni

Sóknaráætlun Suðurlands fyrir árin 2025 til 2029 var meðal helstu umræðuefna fundarins. Áætluninni er ætlað að stuðla að sjálfbærri þróun og uppbyggingu á Suðurlandi, efla samkeppnishæfni og bæta lífsgæði íbúa. Hún byggir á samráði við íbúa, atvinnulíf og kjörna fulltrúa og skiptist í fjórar meginstoðir: atvinnu og nýsköpun, samfélag, umhverfi og innviði.

Nýr sveitarstjórnarskóli

Á fundinum voru einnig kynnt drög að Sunnlenska sveitarstjórnarskólanum. Um er að ræða nýtt fræðslu- og kynningarátak fyrir nýkjörna sveitarstjórnarfulltrúa á Suðurlandi. Hluti verkefnisins felst í heimsóknum fulltrúa SASS til allra sveitarfélaga landshlutans.

Þá var hafinn undirbúningur að ársþingi SASS, sem fram fer dagana 29. og 30. október. Þar verður meðal annars fjallað um áhersluverkefni samtakanna og sameiginlega hagsmuni sveitarfélaganna á Suðurlandi.

Í fréttinni segir að vinnufundurinn hafi verið árangursríkur og mikill hugur sé í stjórn og starfsfólki að vinna að framgangi og hagsmunum landshlutans á nýju kjörtímabili. Nánar má lesa á vef SASS.