Óvissa ríkir um siglingar Herjólfs um hvítasunnuhelgina eftir að nýjar veður- og ölduspár benda til þess að aðstæður við Landeyjahöfn geti orðið erfiðar. Þetta kemur fram í tilkynningu frá Herjólfi ohf.

Samkvæmt tilkynningunni eru allar ferðir enn á áætlun að svo stöddu. Ef gera þarf breytingar verði hins vegar tilkynnt um þær um leið og ákvörðun liggur fyrir.

Fram kemur að vindur hafi nú meiri áhrif á siglingagetu Herjólfs þar sem skipið siglir á annarri skrúfunni eftir bilun í rafmótor. Af þeim sökum gæti þurft að fella niður ferðir með skömmum fyrirvara og eru farþegar hvattir til að ferðast fyrr frekar en síðar ef kostur er.

Í tilkynningunni kemur jafnframt fram að forsvarsmenn Herjólfs hafi óskað eftir aðstoð frá Baldri við siglingar milli lands og Eyja um hvítasunnuhelgina, en ekki hafi reynst unnt að verða við þeirri beiðni.