Lottópotturinn síðastliðinn laugardag var sexfaldur og fyrsti vinningur nam rúmum 130,9 milljónum króna. Það var rúmlega áttræð kona í Reykjavík sem reyndist vera hinn heppni vinningshafi, en hún hafði keypt miðann sinn á lotto.is.

Í tilkynningu frá Getspá segir að vinningshafinn hafi verið nývaknaður á mánudagsmorgni þegar gleðisímtalið barst. Hún hafði enga hugmynd um að hún væri með stóra vinninginn og tók fréttunum af slíkri yfirvegun að fyrstu viðbrögðin voru einfaldlega: „Já, hérna.“

Eftir símtalið brá þó öðru við þegar hún hringdi í son sinn og sagði honum tíðindin. Hann brást við með mun meiri tilþrifum og varð, að hennar sögn, „hoppandi glaður“.

Konan, sem býr miðsvæðis í Reykjavík, lét vinninginn ekki hafa teljandi áhrif á daglegt líf sitt. Með bros á vör nýtti hún góða veðrið í vikunni til að rölta niður á skrifstofu Íslenskrar getspár og ganga frá undirritun vinningsins.

Aðspurð um framtíðarplön sagði hún að henni hefur alltaf þótt mikilvægt að láta gott af sér leiða og því væri líklegt að vinningurinn kæmi hennar nánustu einnig til góða. Þá sagðist hún lengi hafa dreymt um að ferðast til Asíu en hingað til hefði kostnaður staðið í vegi og nú hefur hún loksins tækifæri til að láta þann draum rætast.

Í tilkynningunni er vinningshafanum óskað innilega til hamingju og um leið er þakkað fyrir veittan stuðning, sem skiptir gríðarlega miklu máli fyrir fatlað fólk sem og íþrótta- og ungmennafélögin í landinu, þar sem þau njóta góðs af allri sölu Lottó.