Meðal erinda á fundi bæjarráðs þann 30. júlí sl. voru rekstrar- og afreksstyrkir til aðildarfélaga ÍBV-héraðssambands.

Máli af fundi fjölskyldu- og tómstundaráðs var vísað til bæjarráðs þar sem um var að ræða reglur um styrki til efnilegs íþróttafólks vegna landsliðsverkefna.

Ungt landsliðsfólk heldur launum

Lagt var til að ungt landsliðsfólk haldi launum sé það í sumarvinnu hjá Vestmannaeyjabæ þegar það fer í landsliðsverkefni. Einnig að A-landsliðsfólk yrði mætt með launastyrk vegna fjarveru frá vinnu vegna landsliðsverkefna, sé það starfsfólk sveitarfélagsins. Þá gætu iðkendur sótt um sérstakan ferðastyrk, greiði sérsamband ekki ferðakostnað þeirra við landsliðsferðir erlendis.

Bæjarráð samþykkti reglurnar sem taka gildi afturvirkt frá og með 1. maí sl. og skal gera ráð fyrir kostnaði í fjárhagsáætlunarvinnu næsta árs. Nú er hægt að sækja um styrki og laun skv. reglum þessum í íbúagátt á heimasíðu Vestmannaeyjabæjar.

Bæjarráð skorar á ríkið og ráðherra málaflokksins að styðja betur við afreksstarf á Íslandi og sameiginleg landslið okkar.