Það var þungt yfir fólki á starfsmannafundi á Heilbrigðisstofnun Vestmannaeyja (HSV) eftir hádegi í gær þar sem Gunnar Kr. Gunnarsson, framkvæmdastjóri tilkynnti að skurðstofunni yrði lokað frá og með 1. október nk. Gunnar sagði að þeim væri nauðugur einn kostur, að skera niður í rekstrinum og þessi leið hefði verið valin. Hinn kosturinn var að loka öldrunarþjónustu og fækka sjúkrarúmum um helming. Hvorugur kosturinn var að hans mati góður.