Spennandi vorönn hjá Visku – Skrifstofuskólinn nýjasta námsleiðin

Viska undirbýr nú vorönnina 2026 og boðið verður upp á fjölbreytt úrval námskeiða og námsleiða fyrir íbúa. Minna Björk Ágústsdóttir, forstöðukona Visku, segir að mikil eftirvænting ríki fyrir nýju námi – Skrifstofuskólanum – sem hefjist um leið og næg þátttaka næst. Eyjafréttir ræddu við Minnu um það helsta sem fram undan er.

Vorönn Visku 2026 er nú að taka á sig mynd og samkvæmt Minnu Björk Ágústsdóttur, forstöðukonu Visku, bíður næsta tímabil upp á fjölbreytt úrval náms og námskeiða. Skráningar eru þegar hafnar og margt spennandi í undirbúningi.

Ný námsleið og fjölbreytt námsframboð

„Það væri einstaklega gaman að koma nýja náminu okkar, Skrifstofuskólanum, á koppinn í vetur,“ segir Minna. „Við þurfum tíu nemendur til að hefja námið og vonumst til að íbúar sjái tækifæri í þessu – bæði til að efla færni sína og opna á frekara nám.“

Skrifstofuskólinn er 160 klukkustunda nám sem veitir þeim sem hyggjast starfa á skrifstofu góða undirstöðu og getur verið metið sem allt að átta framhaldsskólaeiningar. „Markmiðið er að efla sjálfstraust og starfsfærni, kenna verkfæri og verkferla sem nýtast í störfum á hinum ýmsu vinnustöðum,“ bætir hún við.

Einnig heldur áfram vinsælt nám í íslensku fyrir útlendinga sem hefst í febrúar. „Skráning fer fram hjá Jóhönnu Lilju á netfangið jle@viskave.is,“ segir Minna. Þá bendir hún á að námið Færni á vinnumarkaði fyrir fatlað fólk hafi sannað sig í tveimur fyrri lotum. „Það hefur gefið ótrúlega góða raun og við erum gríðarlega stolt af þeim árangri.“

Tómstundir, námskeið og samstarfsverkefni

Auk formlegs náms verður boðið upp á fjölbreytt tómstundanámskeið á vorönn. „Við erum þegar með nokkur námskeið opin fyrir skráningu og fleiri bætast við fljótlega. Það er alltaf líf og fjör í þessari dagskrá,“ segir Minna. Þá nefnir hún að kvennaráðstefnan MEY verði nú haldin í fjórða sinn þann 18.apríl.

Tvö námskeið fyrir eldri borgara eru einnig á dagskrá: gervigreindarnámskeið og námskeiðið Listin að eldast vel. „Þau verða auglýst nánar á næstu dögum, en við vitum að þessi námskeið hitta vel í mark.“

Á vordögum verður frumsýnd ný leiksýning í samstarfi við Heimaey hæfingarmiðstöð. „Samstarfið hefur verið einstaklega gefandi og við hlökkum til að kynna afraksturinn fyrir samfélaginu.“

Í lokin hvetur Minna fólk til að fylgjast með heimasíðunni viskave.is eða senda fyrirspurn á viska@viskave.is. „Við tökum fagnandi á móti öllum sem vilja efla færni sína – og vonumst að sjálfsögðu til að sjá sem flesta í Skrifstofuskólanum.“

Nýjustu fréttir

Fréttir

Kjarnaborun hafin í Eyjum

Aðsend grein

Höfum áhrif – Framtíðin er í okkar höndum

Áhugavert

Sex hópar frá FÍV tóku þátt í vörumessu í Smáralind

Stjórnmál

Spurt og svarað: Hannes Kristinn frá Sjálfstæðisflokknum

Fréttir

HSU: Gervigreind styður við myndgreiningu og bráðaþjónustu

Íþróttir

ÍBV kom til baka og vann frábæran sigur gegn Haukum

Íþróttir

Íslandsmótið í Boccia hófst í Eyjum í dag

Aðsend grein

Hvar er grafskipið? Hvar eru upplýsingarnar?

Mest lesið

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.

Forðist áfenga drykki daginn fyrir brottför

Forðist djúpsteiktan, brasaðan eða saltan mat daginn fyrir siglingu.

Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.

Forðist mikið koffein. Mikið kaffi er ekki það sem maganum líkar fyrir sjóferð.

Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.

Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

Koffínátín – fæst án lyfseðils

Postafen – fæst án lyfseðils

Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.

Piparminta og te eru einnig gömul húsráð við ferðaveiki.

Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

Minna finnst fyrir hreyfingu og veltingi ef maður er staddur næst miðju bátsins.

Mörgum finnst gott að vera í kulda, t.d.að vera úti á dekki og láta vindinn leika um sig.

Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Nýjustu fréttir

Góð ráð fyrir siglingu

Sjóveiki