Stefnt er að því að mæla dýpið í Landeyjahöfn á morgun eða á föstudag, samkvæmt nýjum upplýsingum frá G. Pétri Matthíassyni, forstöðumanni samskiptadeildar Vegagerðarinnar.

„Spáin er þannig núna að ekki er útlit fyrir að hægt sé að halda áfram dýpkun fyrr en á seinna flóði á föstudag,“ segir Pétur. Herjólfur hefur stefnt að því að sigla um leið og aðstæður leyfa, en það ræðst af stöðunni í höfninni.

„Það mun væntanlega ráðast af niðurstöðu mælinganna og hvernig gengur að halda áfram með dýpkunina. Það verður metið á föstudag reikna ég með,“ segir Pétur.

Staðan í Landeyjahöfn hefur undanfarið haft veruleg áhrif á samgöngur milli lands og Vestmannaeyja, en framundan er fyrsta stóra ferðahelgi sumarsins og því er beðið með eftirvæntingu eftir niðurstöðum næstu mælinga.