Stefnt er að því að þrýstiprófanir á almannavarnarlögninni NSL-4 hefjist í þessari viku, að því gefnu að allar forsendur verði fyrir hendi. Þetta kemur fram í uppfærslu Vestmannaeyjabæjar um stöðu málsins.

Undirbúningur prófananna hefur farið fram í samráði við NOV, framleiðanda lagnarinnar. Fyrirtækið hefur samþykkt framkvæmdalýsingu og verður þrýstingur aukinn í áföngum samkvæmt fyrirfram skilgreindu verklagi.

Markmiðið er að afla skýrari upplýsinga um ástand lagnarinnar og kanna hvernig hún bregst við þegar hún er sett undir álag. Tryggingafélögum hefur verið gerð grein fyrir fyrirhuguðum aðgerðum og þau upplýst um framgang málsins.

Enn er beðið eftir lokaskýrslu SUSEA7 vegna tjónsins og því liggja ekki fyrir nýjar upplýsingar frá útlagnaraðilanum að svo stöddu. Vestmannaeyjabær segist munu birta frekari upplýsingar þegar niðurstöður lokaskýrslunnar og þrýstiprófananna liggja fyrir.