- Eyjafréttir
- ·
- Fréttir
- ·
Steinunn sýnir í Einarsstofu
Myndlistakonan Steinunn Einarsdóttir opnar sýningu sína í dag, fimmtudaginn 28. nóvember klukkan 17:00. Steinunn hefur haldið fjölmargar einka- og samsýningar síðan hún flutti heim frá Ástralíu fyrir um 18 árum og mun þessi sýning vera tuttugasta og önnur sýning hennar.
Steinunn útskrifaðist sem “Visual Art and Design” artist frá Barrier Reef Institute of T.A.F.E. Listaháskóla í Townsville. Hún hefur verið að mála og kenna síðan og sýnir árlega afrekstur nemenda sinna þar sem gróskan hefur verið mjög mikil. Sem dæmi má nefna að stofnað hefur verið Myndlistarfélag Vestmannaeyja þar sem efnilegir listamenn halda listinni lifandi með sýningum og uppákomum.
Listvinir Safnahúss bjóða alla velkomna á opnun sýningar Steinunnar í Einarsstofu í dag, fimmtudag kl. 17.
Sýningin verður opin til 11. desember næstkomandi og verður opið virka daga á opnunartíma Safnahúss, mánudaga til fimmtudags 10 til 18 og föstudaga 10 til 17. Vakin er sérstök athygli á því að sýningin er einnig opin laugardaga og sunnudaga klukkan 13 til 16.
