Vestmannaeyjar Open pílumótinu sem hófst á föstudaginn lauk í gær með æsispennandi keppni. Parakeppnin var á föstudaginn en í gær var einstaklingskeppnin. Kári Vagn Birkisson, 13 ára stóð uppi sem sigurvegari. Vann landsliðsþjálfarann, Pétur Rúðrik Guðmundsson í úrslitaleiknum. Kári Vagn er mjög efnilegur píluspilari og náði níu pílna legg fyrir ekki svo löngu síðan sem er það besta sem hægt er að ná. Lukasz Knapik og Einar Gíslason spiluðu upp á þriðja sætið og hafði Lukasz Knapik betur.

Í öðrum flokki spiluðu Guðlaugur Gísli Guðmundsson og Ásgeir Lárus Ágústsson til úrslita og hafði Ásgeir Lárus betur. Í þriðja og fjórða sæti enduðu Árni Gunnarsson og Árni Vigfús Karlsson. Í kvenna flokki voru sex keppendur. Sigurvegari var Nadía Ósk Jónsdóttir. Vann hún Arndísi Sif Guðjónsdóttur í úrslitum og í þriðja og fjórða sæti enduðu þær Maria Emma Canete og Svana Hammer.

Keppendur voru alls 58, sex í kvennaflokki og 52 í karlaflokki og var sá elsti 79 ára. Flestir gestanna komu frá Selfossi og Grindavík. Keppt var í sal eitt í Íþróttamiðstöðinni og var aðstaða öll til fyrirmyndar og mótið allt Pílufélagi Vestmannaeyja til mikils sóma.

Pílufélag Vestmannaeyja vill þakka öllum fyrir komuna og hjálpina við að halda þetta mót. Starfsemin er að eflast og verða nýir félagar teknir inn fyrsta október.