Ísfisktogarinn Vestmannaey VE landaði 82 tonnum í Vestmannaeyjum í fyrradag. Um 37 tonn af aflanum var ufsi en síðan var mest af þorski og ýsu.

Birgir Þór Sverrisson skipstjóri sagðist í samtali við vef Síldarvinnslunnar vera ánægður með túrinn. „Þetta gekk bara býsna vel. Við byrjuðum á Pétursey og fórum austur á Höfða og síðan var farið kantana til baka. Aflinn var misjafn en við fengum ágætis glennur inn á milli. Haldið var á ný til veiða strax að löndun lokinni og við erum nú á landleið með 24 tonn eftir þrjú hol. Við vorum að nota síðasta dag kvótaársins,“ segir Birgir Þór.

Bergur VE landaði í Neskaupstað sama dag að aflokinni stuttri veiðiferð. Jón Valgeirsson skipstjóri var ánægður með aflabrögðin. „Aflinn var ýsa og þorskur sem fékkst í fimm holum. Við vorum að veiðum á Glettinganesflaki og þarna var töluvert af fiski innan um síldina,“ segir Jón.