„Þessa vikuna komu til Vestmannaeyjahafnar tíu skemmtiferðaskip með samtals um 8.000 farþega,“ segir í færslu á Facebook-síðu Vestmannaeyjahafnar. Í gær voru tvö skemmtiferðaskip í höfn í Eyjum. „Mikil vinna fylgir svona viku, bæði fyrir starfsmenn hafnarinnar og ferðaþjónustuna, og er ekki hægt annað en að hrósa öllum sem komu að þessu,“ segir í færslunni.

Starfsmenn hafnarinnar fóru um borð í þrjú skipanna og afhentu áhöfnum þeirra viðurkenningarplatta fyrir hönd Vestmannaeyjahafnar. Hefð þegar skip koma í fyrsta skipti til Eyja. Veðrið lék við heimamenn og gesti í gær og sólin setti skemmtilegan svip á annasaman dag í höfninni. „Við, eins og allir aðrir, fögnuðum sólinni mjög í dag og fengum Tóa Vídó til að taka fyrir okkur myndir. Fleiri myndir og myndbönd verða birt á næstu dögum,“ segir enn fremur í færslu Vestmannaeyjahafnar.

Meðal skipa í höfn í gær var lúxusleiðangursskipið Seabourn Venture, sem lá við Nausthamarsbryggju.