Bæjarstjórn Vestmannaeyja samþykkti nú í hádeginu að stofna hlutafélag um smíði og eignarhald á nýrri Vestmannaeyjaferju. Auk Vestmannaeyjabæjar verður ríkinu, öðrum sveitarfélögum á áhrifasvæði Landeyjahafnar, lífeyrissjóðum og áhugasömum fjárfestum boðin aðkoma að félaginu. Í greinargerð sem fylgir afgreiðslu málsins segir að forsenda félagsins sé leigusamningur við ríkið til að minnsta kosti 10 ára, sem tryggir að hluthafar fái hlutafé sitt greitt til baka á rekstrartímanum auk lágmarksávöxtunar.