Úrval lesefnis fyrir unga lesendur hefur aukist á Bókasafni Vestmannaeyja með tilkomu nýrra léttlestrarbóka frá vestmannaeyska fyrirtækinu Út fyrir bókina.

Fyrirtækið sérhæfir sig í gerð lesefnis, lesskilningsverkefna og stærðfræðiverkefna fyrir byrjendur. Höfundar námsefnisins eru Unnur Líf Ingadóttir Imsland og Snjólaug Árnadóttir, grunnskólakennarar með áralanga starfsreynslu sem starfa sem umsjónarkennarar á yngsta stigi.

Þær hófu árið 2019 að útbúa eigið námsefni þar sem þeim þótti skorta efni sem höfðaði nægilega vel til nemendahóps þeirra. Verkefnið hófst í litlum Facebook-hópi en óx jafnt og þétt og varð síðar að vefsíðunni utfyrirbokina.is.

Bækurnar fáanlegar til útláns

Skólar og einstaklingar geta gerst áskrifendur að námsefninu á vefsíðu Út fyrir bókina. Bókasafn Vestmannaeyja ákvað hins vegar að ganga skrefinu lengra og lét prenta bækurnar í samstarfi við höfundana. Þær eru nú fáanlegar til útláns á safninu.

Íslandsbanki styrkti útgáfu bókanna myndarlega. Á vef Vestmannaeyjabæjar kemur fram að starfsfólk safnsins sé spennt fyrir þessari nýju viðbót og hvetji unga lesendur til að líta við. Sumarlestur Bókasafnsins sé jafnframt enn í fullum gangi.