Héraðsdómur Suðurlands kvað í dag upp dóm í skaðabótamáli vegna skemmda á vatnslögninni NSL-3 og ljósleiðara í Vestmannaeyjahöfn. Samkvæmt yfirlýsingu sem Vinnslustöðin birti á vef sínum voru Vinnslustöðin hf., Huginn ehf. og VÍS tryggingar hf. sýknuð af kröfum stefnenda.

Í yfirlýsingunni segir jafnframt að viðurkennt hafi verið að Huginn ehf. og VÍS tryggingum hf. sé heimilt að takmarka ábyrgð sína. Þá hafi dómurinn ekki fallist á að Vinnslustöðin hf. teldist útgerðarmaður skipsins og málskostnaður hafi verið felldur niður.

Þar kemur einnig fram að útgerð Hugins telji dóminn mikilvægt skref í úrlausn málsins, en að líklegt sé að málinu verði áfrýjað og því verði ekki tjáð sig efnislega um niðurstöðuna að svo stöddu.

Eyjafréttir munu greina nánar frá forsendum dómsins þegar hann verður birtur opinberlega.