Næstkomandi laugardag ætla systurnar Erla Björg og Rannveig Káradætur að halda söngtónleika í Akóges.
Erla Björg hefur verið búsett undanfarin ár í Salzburg í Austurríki þar sem hún stundar söngnám hjá pr. Mörtu Sharp og Dario Vagliengo.
Rannveig Káradóttir stundar söngnám við Tónlistarskólann í Reykjavík hjá Alinu Dubik og lýkur burtfararprófi þaðan í vor.

Systurnar hafa sungið saman frá unga aldri og komið víða fram m.a. með Gospelkór Reykjavíkur. Þær stunduðu báðar nám við Tónlistarskólann í Garðabæ og lærðu þar á ýmis hljóðfæri en snéru sér svo báðar að klassískum söng. Meðleikari þeirra að þessu sinni er Lára Rafnsdóttir undirleikari í Söngskólanum í Reykjavík og Tónlistarskólanum í Reykjavík.

Rannveig og Erla Björg eru ættaðar úr Vestmannaeyjum, afi þeirra Guðmundur Arason járnkaupmaður bjó í Laufási á unga aldri.

Dagskráin verður fjölbreytt og samanstendur m.a. af verkum eftir Mozart, Puccini R.Strauss, Dvorak, Faure og Karli O. Runólfssyni.

Miðaverð er 1500 kr (1000 kr fyrir eldri borgara)