Háskólinn á Bifröst opnar í dag útibú í Vestmannaeyjum. Segir skólinn, að tilgangur útibúsins sé að veita Vestmannaeyingum upplýsingar um námsframboð Háskólans á Bifröst í styttri námsleiðum, frumgreinadeild, grunnnámi í háskóla, meistaranámi og á sviði símenntunar og endurmenntunar, bæði í staðnámi og fjarnámi auk annarra upplýsinga um starfsemi Háskólans á Bifröst.

Háskólinn á Bifröst og menntastofnanir í Vestmannaeyjum munu vinna sameiginlega að aukinni kennslu og annarri starfsemi í Vestmannaeyjum en nú eru á þriðja tug Eyjamanna auk fjölskyldna sem stunda nám í Háskólanum á Bifröst, í staðnámi og fjarnámi.  Aðilar eru sammála um að auka fjölda námskeiða, styttri sem lengri, bæði í Vestmannaeyjum og í fjarnámi.