Gísli Valtýsson, prentari, ritstjóri og ábyrgðarmaður Frétta/ Eyjafrétta mætti til leiks á Fréttum árið 1982 og þar var vinnustaður hans til tuga ára.  Áður starfaði hann sem smiður hjá Hraðfrystistöð Vestmannaeyja og líkaði prýðilega þar. En einn góðan veðurdag komu til hans Arnar Sigurmundsson og Sigurður Jónsson, kennari, og buðu honum í bíltúr. Þeir tveir áttu Eyjaprent og vikublaðið Fréttir, ásamt þeim Andra Hrólfssyni, Sigurði Þ. Jónssyni og Guðlaugi Sigurðssyni, prentara. Nú var Guðlaugur að flytja til Reykjavíkur og erindið með þessum bíltúr var að reyna að fá Gísla til að taka við af honum á blaðinu, þar sem hann var bæði ritstjóri og prentari. Og þetta endaði með því að hann sló til. Kláraði uppsagnarfrest hjá Hraðfrystistöðinni og byrjaði svo á algerlega nýjum vettvangi. Í tilefni af 50 ára afmælis Frétta er Gísli Eyjamaðurinn.

Fullt nafn: Gísli Valtýsson

Fjölskylda: Fjölskyldan er stór en sú sem næst mér stendur eru eiginkonan Hanna  og dæturnar þrjár, Erla, Hrund og Þóra.

Hefur þú búið annarsstaðar en í Eyjum: Ég hef alltaf búið í Eyjum en í Heimaeyjargosinu bjó hluti fjölskyldunnar í Reykjavík en ég var í Eyjum.

Mottó: Ekki geyma til morguns það sem þú getur gert í dag.                                          

Síðasta hámhorfið: Hámhorf er gleypigláp eða maraþonáhorf og er heiti á því þegar fólk horfir á marga sjónvarpsþætti eða bíómyndir í röð í einni setu. – Ég minnist ekki að hafa hámhorft.

Uppáhalds hlaðvarp: Mér líkar hlaðvarpið hjá Veru Illugadóttur.

Uppáhalds kvikmynd: Kvikmyndir eru ekkert sérstakt áhugaefni mitt, en sennilega stendur „Með allt á hreinu“  upp úr.

Aðaláhugamál: Ætli það tengist  ekki hverju æviskeiði fyrir sig. Skátahreyfingin var fyrsta áhugamálið, svo áttu íþróttir allan minn hug og gera svo sem enn. – Ýmis félög sem ég hef verið í hafa alltaf hertekið mig hverju sinni. –  Starf í Félagi eldri borgara hefur svo hin síðari ár verið mitt helsta áhugamál og sennilega verður þar settur punktur.

Hver er þinn helsti kostur: Seigla

Eitthvað sem þú gerir á hverjum degi sem þú gætir ekki verið án: Að kyssa konuna mína „góðan dag“.

Hvað óttast þú mest: Að eitthvað alvarlegt komi fyrir fjölskylduna mína.

Hvaða tónlist kemur þér í gott skap: Það er sagt að um 35 ára aldur hafi flestir mótað sinn tónlistarsmekk. Held að það passi við mig. –  Eyjalögin og Geirmundur koma mér alltaf í gott skap.

Hvaða ráð myndir þú gefa 18 ára þér, sem veganesti út í lífið: Að ganga út í lífið með jákvæðu hugarfari.

Hvað er velgengni fyrir þér: Jákvætt hugarfar.

Hvar sérðu sjálfan þig eftir 20 ár: Orðinn 98 ára? – Spurningin svarar sér eiginlega sjálf.

Fallegasti staður sem þú hefur komið á: Eftir 78 ára búsetu í Eyjum er eina rétta svarið „Vestmannaeyjar”.

Nú stýrðir þú lengi Fréttum/Eyjafréttum. Hvernig er að sjá miðilinn ná þessum áfanga að verða 50 ára? Það er mjög ánægjulegt og ég er bara nokkuð stoltur að hafa fengið að taka þátt í þeim rekstri um tíma.

Hvernig sérðu fyrir þér framtíð Eyjafrétta? Eflaust á tæknin eftir að breyta núverandi rekstrarformi eitthvað, – já sennilega mjög mikið, – en hvernig sé ekki fyrir mér . – Held að pappírsblöðin lifi varla í 50 ár í viðbót. –  Rekstrarform Eyjafrétta hefur líka breyst mjög mikið á þeim 50 árum frá því fyrsta blaðið leitt dagsins ljós árið 1974.

Hvað er framundan hjá þér í sumar? Vonandi að halda áfram að lifa lífinu lifandi og taka þátt í því, sem það býður uppá.

Eitthvað að lokum: Til hamingju aðstandendur Eyjafrétta, með 50 ára afmælið.