Í dag, 14. nóvember eru 50 ár frá Surtseyjargosi. �?að voru áhafnarmeðlimir á Ísleifi II sem tilkynntu um hugsanlegt neðansjávargos um 18 km suðvestur af Heimaey að morgni dags en daginn eftir, náði gosmökkurinn hátt í loft upp og 10 metra vikurhóll hafði hlaðist upp ofansjávar. Gosið stóð yfir með hléum í um þrjú og hálft ár og er því lengsta eldgos á Íslandi frá upphafi byggðar. Surtsey hefur verið friðuð nánast frá upphafi en þannig eignuðust vísindamenn um allan heim náttúrulega vísindastofu þar sem þeir gátu fylgst með þróun lífs og almennt þróun eyjunnar um áratuga skeið. Surtsey er jafnframt á Heimsminjaskrá UNESCO.

�?essara tímamóta verður minnst klukkan 16:00 í dag en Vestmannaeyjabær mun þá bjóða upp á kaffi og kökku í Surtseyjarstofu og þar verða jafnframt flutt stutt erindi um Surtsey. Surtseyjarstofa verður einnig opin almenningi án endurgjalds n.k. laugardag 16. nóv. milli klukkan 13 og 16.

Í Eyjafréttum er jafnframt myndarleg umfjöllun um Surtsey, þar sem m.a. er rætt við tvo Eyjamenn um mikla háskaför út í Surtsey strax á fyrstu vikum gossins og máttu þeir teljast heppnir að hafa komist lífs af úr þeirri för. Meðfylgjandi þessari frétt er þáttur sem sýndur var á Fjölsýn fyrir 9 árum en Júlíus G. Ingason fékk þá tækifæri til að fara með vísindamönnum út í Surtsey og mynda hana í bak og fyrir.