Karlalið ÍBV tryggði sér oddaleik gegn Val með því að leggja Reykvíkinga að velli á heimavelli þeirra nú rétt í þessu en lokatölur urðu 26:27. Leikurinn var hin mesta skemmtun en liðin skiptust á að hafa forskotið og augljóst að þarna mætast tvö jöfn lið, enda mátti varla á milli sjá. Sérfræðingar hafa oft talað um að breiddin í Valsliðinu sé meiri og komi til með að skipta sköpum en það hefur ekki enn gerst. Eyjamenn sýndu líka að þeir eiga nokkur tromp uppi í erminni því ungir leikmenn eins og Dagur Arnarsson og Svavar Kári Grétarsson komu inn á og stóðu sig vel, ekki síst Svavar Kári sem lítið hefur spilað með meistaraflokki í vetur en hann skoraði tvö mörk í leiknum. Eyjamenn voru tveimur mörkum yfir þegar tæpar þrjár mínútur voru eftir en Valsmönnum tókst að jafna metin. ÍBV brunaði í sókn þegar um mínúta var eftir og Agnar Smári Jónsson fiskaði vítakast. Theodór Sigurbjörnsson steig ískaldur á línuna og skoraði úr vítinu mikilvæga og kom ÍBV aftur yfir, 26:27. Valsmenn brunuðu í sókn en síðasta orðið átti Kolbeinn Ingibjargarson, markvörður ÍBV sem varði síðasta skot Valsmanna. Um leið rann leiktíminn út og fagnaðarlætin fara í sögubækurnar því þau voru mögnuð.

Stuðningurinn sem bæði lið ÍBV fengu í dag var frábær. Um 100 manns fóru frá Eyjum á leikinn og veittu fjölmörgum stuðningsmönnum liðsins liðsauka.

ÍBV og Valur mætast að nýju á fimmtudaginn. Sama verður upp á teningnum og á sunnudaginn, tveir leikir í röð, fyrst stelpurnar klukkan 14:00 og svo strákarnir klukkan 16:00. Stemmningin á sunnudaginn fór í sögubækurnar og má búast við meiri stemmningu, fleira fólki og vonandi frábærum handbolta. Hjá körlunum ræðst á fimmtudaginn hvort liðið kemst í úrslit og mætir þar FH eða Haukum. �?essi veisla er eitthvað sem enginn má missa af.