Fyrr í mánuðinum fór fram Meistaramót Golfklúbbs Vestmannaeyja. Mótið fór fram dagana 10. til 13. júlí og er þetta í 85. skiptið sem að það er haldið. Fjölmargir efnilegir kylfingar tóku þátt en þátttakendur sem luku keppni voru 90 talsins og spiluðu í samtals 11 flokkum. Vestmannaeyjameistarar 2024 í karla- og kvennaflokki í golfi eru þau Kristófer Tjörvi Einarsson og Sóley Óskarsdóttir. Kristófer lauk leik á mótsmeti og lék samtals á 9 undir pari. Þessir ungu og efnilegu kylfingar eiga framtíðina fyrir sér í íþróttinni og eru Kristófer og Sóley Eyjamennirnir að þessu sinni.
Kristófer Tjörvi
Fullt nafn: Kristófer Tjörvi Einarsson
Fæðingardagur: 30. janúar 2001
Fæðingarstaður: Reykjavík
Fjölskylda: Foreldrar mínir eru Sara Jóhannsdóttir og Einar Gunnarsson. Síðan á ég þrjú systkini, Amelíu Dís, Aron Gunnar og Jóhann Darra. Kærastan mín heitir Hólmfríður Arna.
Mottó: Mikilvægasta trúin er trúin á sjálfan sig.
Síðasta hámhorfið: Baby reindeer
Uppáhalds hlaðvarp: Dr. Football
Uppáhalds kvikmynd: Shawshank redemption
Uppáhalds íþróttamaður og íþróttafélag: Lionel Messi og Barcelona
Uppáhalds golfvöllur: Urriðavöllur hérlendis og La Galiana erlendis
Aðaláhugamál: Íþróttir
Eitthvað sem þú gerir á hverjum degi sem þú gætir ekki verið án: Svefn
Hvaða tónlist kemur þér í gott skap? Ég hlusta á Júníus Meyvant og Zach Bryan til þess að koma mér í gott skap.
Hvað er velgengni fyrir þér? Velgengni fyrir mér að að bæta sig frá degi til dags. Það þarf ekki að skipta máli hversu mikil bætingin er. Bætingin getur verið margskonar, hugarfarið, spilamennskan eða að vera betri manneskja en maður var í gær.
Hvar sérðu þig eftir tíu ár? Ég sé fyrir mér að vera í góðri vinnu hvort sem það er hérlendis eða erlendis með fjölskyldunni minni.
Hverju þakkar þú þennan góða árangur á golfvellinum? Þolinmæði, þrautseigju og að hafa gaman að því að vera í góðum félagsskap á vellinum.
Hvernig kviknaði áhugi þinn á golfi? Golf hefur fylgt mér alla mína ævi. Ég kem úr mikilli golffjölskyldu þannig að ég held að ég hafi alltaf haft áhuga á golfi.
Hvert stefnir þú í íþróttinni? Ég stefni á að vera fyrirmynd fyrir aðra í íþróttinni. Mig langar að halda áfram að ná árangri og hafa gaman af því að spila.
Hvað er framundan hjá þér í sumar? Framundan er Íslandsmót golfklúbba hér í Eyjum þar sem markmiðið er að koma okkur aftur upp í deild þeirra bestu.
Eitthvað að lokum: Mig langar að hrósa golfklúbbnum og styrktaraðilum fyrir frábært starf. Þeirra framlag er gríðarlega mikilvægt.
Sóley Óskarsdóttir
Fullt nafn: Sóley Óskarsdóttir
Fæðingardagur: 3. september 2009
Fæðingarstaður: Landspítalinn í Reykjavík
Fjölskylda: Mamma Kolbrún Sól Ingólfsdóttir, pabbi Óskar Haraldsson og litli bróðir Ari Óskarsson.
Mottó: Yolo
Síðasta hámhorfið: Grey’s anatomy.
Uppáhalds hlaðvarp: Hlusta eiginlega ekki á hlaðvörp.
Uppáhalds kvikmynd: Mamma mia og The Hangover
Uppáhalds íþróttamaður og íþróttafélag: Rory Mcllroy og ÍBV
Uppáhalds golfvöllur: Vestmannaeyjavöllur og Jaðarsvöllur
Aðaláhugamál: Golf
Eitthvað sem þú gerir á hverjum degi sem þú gætir ekki verið án: Drekka collab og fara í golf.
Hvaða tónlist kemur þér í gott skap? Gömul íslensk tónlist.
Hvað er velgengni fyrir þér? Að vinna eða ná markmiðum.
Hvar sérðu þig eftir tíu ár? Vonandi ennþá í golfi.
Hverju þakkar þú þennan góða árangur á golfvellinum? Júlla, Kalla, Jóni Valgarð, Þorsteini, mömmu, pabba og peyjunum sem ég æfi með.
Hvernig kviknaði áhugi þinn á golfi? Bara að vera í golffjölskyldu og þegar ég horfði á fyrsta golfmótið mitt.
Hvert stefnir þú í íþróttinni? Háskólagolf.
Hvað er framundan hjá þér í sumar? Örugglega Íslandsmót unglinga og nokkur mót á unglingamótaröðinni.
Úr 13. tölublaði Eyjafrétta.
