Rekstrartekjur Ísfélagsins námu í fyrra 23,6 milljörðum króna, rekstrarhagnaður var 4,5 milljarðar króna og var hagnaður eftir skatta 2,2 milljarðar króna. Var EBITDA 6,6 milljarðar króna. Þetta kemur fram í ársreikning Ísfélagsins sem sendur var ásamt tilkynningu til Kauphallarinnar í dag.

Sé staða á efnahag félagsins í lok ársins 2024, færð í íslenskar krónur á lokagengi ársins (138,2), eru heildareignir 107,5 milljarðar króna, fastafjármunir 94,4 milljarðar króna og veltufjármunir 13,1 milljarður króna. Eigið fé í lok árs 2024 var 76,1 milljarður króna og skuldir og skuldbindingar 31,4 milljarðar króna.

Samdráttur vegna aflabrests í loðnu og vegna lélegrar makrílveiði

Haft er eftir Stefáni Friðrikssyni forstjóra Ísfélagsins í tilkynningunni að töluverður samdráttur hafi verið í rekstri félagsins á árinu 2024 sem skýrist að mestu leyti vegna aflabrests í loðnu á síðastliðnum vetri og lélegrar makrílveiði í sumar. Nauðsynlegt er að rannsaka betur loðnustofninn sem er svo mikilvægur í vistkerfi hafsins hér við land og reyna að fá svör við því hvers vegna hann skilar sér ekki betur af fjalli ef svo má að orði komast. Horfurnar eru aftur á móti góðar fyrir næstu vetrarvertíð og miklar líkur á upphafskvóta en sagan segir okkur, því miður, að þar sé ekki á vísan að róa.

Veiðar og vinnsla á síld gengu vel á árinu. Góð eftirspurn var á mörkuðum fyrir afurðir félagsins og verð á frosnum og ferskum afurðum hækkaði. Verð á fiskimjöli var ágætt á árinu en verð á lýsi lækkaði.

Umtalsverðar fjárfestingar í fyrra

Þá segir Stefán að frystitogarinn Sólberg hafi skilað góðri afkomu á árinu og var aflahæsta bolfiskskip landsins. Sigurbjörg, nýr ísfisktogari félagsins, hóf veiðar um miðjan ágúst en skipið leysir þrjú eldri skip af hólmi.

Fiskvinnslu félagins í Þorlákshöfn var lokað í haust. Ástæðurnar eru, eins og áður hefur komið fram, annars vegar að ekki eru nægar aflaheimildir fyrir hendi og hins vegar aflabrestur í humarveiðum.

Afli skipa félagsins var um 78.500 tonn og framleiddar afurðir voru um 32.600 tonn. Mjöl- og lýsisframleiðsla var tæp 14.400 tonn.

Umtalsverðar fjárfestingar voru á árinu.  Smíði ísfisktogarans Sigurbjargar lauk í Tyrklandi, félagið keypti Pathway, uppsjávarskip frá Skotlandi, sem afhent verður í maí á þessu ári. Þá hófst undirbúningur að stækkun á fiskimjölsverksmiðju félagsins í Vestmannaeyjum og bygging nýrrar frystigeymslu á Þórshöfn.

Hækkun kolefnisgjalds um 60% um síðustu áramót er sérstakt umhugsunarefni

Félagið undirritaði lánasamning að fjárhæð 220 milljónir evra við hóp banka í lok janúar á þessu ári. Lánið er til fimm ára með 25 ára afborgunarferli og var nýtt til að endurfjármagna öll vaxtaberandi lán og styrkja lausafjárstöðu félagsins og aðgang að lánsfjármögnun í framtíðinni.

Innlendur kostnaður hefur hækkað umtalsvert, þ.m.t. laun og orkukostnaður. Hækkun kolefnisgjalds um 60% um síðustu áramót er sérstakt umhugsunarefni í ljósi þess að ekki eru aðrar leiðir færar en að notast við jarðefnaeldsneyti í rekstrinum og hækkun þessa sérstaka skatts því enginn hvati til orkuskipta eins og var og er tilgangur laganna sem skattlagningin byggist á. Fyrir liggja einnig áform um innleiðingu reglna um breytingar á viðskiptakerfi með losunarheimildir, þar sem til stendur að útvíkka það enn frekar (ETS2). Slík áform munu auka kostnað við framleiðslu á fiskimjöli og lýsi. Er því verið að auka á kostnað við framleiðslu, án þess að aðgengi að raforku til reksturs sé tryggt.

Áform um að slátra mjólkurkúnni

Stjórnvöld hafa lagt fram frumvarp um gríðarlega hækkun á veiðigjöldum þrátt fyrir að ljóst sé að afkoma greinarinnar megi ekki við frekari kostnaðarhækkunum þegar tekið er tillit til nauðsynlegra fjárfestinga og eðlilegrar afkomu greinarinnar. Engar tilraunir hafa verið gerðar til að skoða áhrif þessara skattahækkana á  atvinnugreinina og samkeppnishæfni hennar. Hærri skattar á fyrirtæki minnka möguleika þeirra á að fjárfesta í betri rekstri og draga úr getu fyrirtækja til að gera betur. Þarna eru því áform að slátra mjólkurkúnni.

Fyrir liggur að sjávarútvegsráðherra ætlar að fjölga strandveiðidögum upp í 48. Því hefur verð heitið að það verði gert án þess að skerða heimildir annarra útgerðaraðila. Gangi þessi áform eftir mun þorskaflinn innan fárra ára aukast langt fram úr veiðiráðgjöfinni og það er ekki farsælt ef markmiðum um sjálfbærar veiðar er varpað fyrir róða, segir Stefán Friðriksson, forstjóri Ísfélagsins.

Þessu tengt: Stóra hættan að við missum það forskot sem við höfum haft