Ísfisktogarinn Bergey VE landaði í Eyjum í fyrrakvöld. Aflinn var 64 tonn, mest þorskur og ýsa. Jón Valgeirsson skipstjóri sagði í samtali við vefsíðu Síldarvinnslunnar að þetta hafi ekki verið nein frægðarför en þó sé allt í lagi og engin ástæða til að kvarta mikið.

„Við vorum mest á Hvalbakssvæðinu en restuðum á Víkinni. Það var norðan eða norðaustan kaldadrulla mestallan túrinn. Við vildum leggja áherslu á ýsu að þessu sinni en hún er sannast sagna hálferfið núna. Hún kemur á endanum, lætur líklega sjá sig þegar síldin hrygnir. Það er venjulega þannig,” sagði Jón. Ennfremur var haft eftir honum að þeir hafi haldið til veiða á ný í gærkvöldi og átti hann von á að fara eitthvað austureftir.