Undirrituð eru sammála um mikilvægi þess að komu- og brottfarartímar almenningssamganga við Vestmannaeyjar standist. Eðlilega getur margt haft áhrif á áætlun Herjólfs, þar á meðal önnur skipaumferð um Vestmannaeyjahöfn. Það varð tilefni þess að framkvæmdastjóri Herjólfs fór þess á leit við hafnarstjóra að tekin verði upp sú regla að Herjólfur njóti forgangs í siglingum innan Vestmannaeyjahafnar.

Erfitt er að verða að fullu við því skv. siglingalögum og siglingareglum. Höfum við því komist að þeirri niðurstöðu að Herjólfi verði veittur slíkur forgangur með þeim fyrirvara að gagnkvæmur skilningur sé á að upp geta komið óhjákvæmileg atvik sem munu hafa áhrif á siglingar Herjólfs innan Vestmannaeyjahafnar.  Hér eftir sem hingað til leggjum við jafnframt mikla áherslu á að samskipti skipstjórnarmanna Herjólfs og starfsmanna Vestmannaeyjahafnar verði lausnamiðuð og góð í oft krefjandi aðstæðum.

Gleðilega Goslokahátíð,

Dóra Björk, hafnarstjóri  og Ólafur Jóhann Borgþórsson, framkvæmdastjóri Herjólfs ohf.