- Eyjafréttir
- ·
- Sjávarútvegur
- ·
„Auglýsing um stöðvun strandveiða mun birtast í stjórnartíðindum síðar í dag þar sem fram kemur að strandveiðar eru bannaðar frá og með 17. júlí.” Framangreindur texti birtist síðdegis í dag á vefsíðu Fiskistofu. Það er því ljóst að strandveiðitímabilinu þetta árið er lokið en strandveiðifrumvarp atvinnuvegaráðherra náðist ekki að afgreiða á Alþingi. Frumvarpið var lagt fram svo tryggja mætti smábátasjómönnum rétt til 48 daga strandveiða.
Í frétt sem birtist á vef Fiskistofu fyrr í dag segir að í dag sé síðasti dagur strandveiða ag öll strandveiðileyfi falli því niður frá og með morgundeginum og er skipum þá heimilt að halda til veiða ef þau eru með almennt veiðileyfi. Ef skip var í núllflokki áður en það fékk strandveiðileyfi þarf að sækja um almennt veiðileyfi áður en haldið er til veiða á ný. Hægt er að skoða hvort skip sé með veiðileyfi á vefsíðu Fiskistofu undir skipaleit en athugið að strandveiðileyfið gæti verið inni í nokkra daga þrátt fyrir að búið sé að fella það úr gildi.
Þeir aðilar sem eiga rétt á byggðakvóta og vilja fá úthlutað eftir að strandveiðum lýkur er bent á að senda beiðni þess efnis á byggdakvoti@fiskistofa.is og óska eftir úthlutun. Öllum erindum verður svarað og reynt verður að bregðast við eins fljótt og kostur er á, en töluvert álag er á starfsfólki Fiskistofu við úthlutun byggðakvóta við lok strandveiða.
Athugið að staða mótframlags á gagnasíðu Fiskistofu kann að vera vantalið þar sem skil á vorskýrslum júní mánaðar eru ekki fyrr en 20. júlí næsktomandi. Sjái útgerðaraðili fram á að þurfa fá byggðakvóta úthlutuðum fyrir þann tíma og telji sig uppfylla kröfu um mótframlag en staðan vantalin í gögnum Fiskistofu bendum við þeim á að hafa samband við vinnsluaðila.
