Staðan í samgöngumálum var rædd í bæjarráði í hádeginu. Rædd var nýsamþykkt þingsályktunartillaga um úttekt í Landeyjahöfn. Samkvæmt tillögunni er miðað við að henni verði lokið eigi síðar en 31. ágúst 2020. Um er að ræða óháða úttekt á höfninni svo að unnt sé að grípa til nauðsynlegra aðgerða til að tryggja heilsárshöfn í Landeyjum. Úttektin mun ekki einskorðast við dýpi Landeyjahafnar. Litið verður til þeirrar reynslu sem komin er af siglingu nýs Herjólfs í Landeyjahöfn til athugunar á því hvaða aðrir þættir, svo sem samspil vinda og sjólags, gætu takmarkað nýtingu hafnarinnar. Þá þyrfti að gera tillögur að úrbótum reynist svo vera.

Fagna úttektinni
Niðurstaða bæjarráðs var eftirfarandi: Bæjarráð fagnar því að Alþingi skuli hafa samþykkt að ráðast í óháða úttekt á Landeyjahöfn og skorar á samgönguráðherra að hefja hana sem fyrst, enda gert ráð fyrir að niðurstöður úttektarinnar liggi fyrir í lok næsta sumars.

Löngu tímabært
Meirihluti bæjarráðs fagnar nýsamþykktri þingsályktunartillögu í bókun sinni og lýsir yfir ánægju að hún komi til framkvæmda. Úttektin er löngu tímabær þar sem frá 2010 hefur ýmsu verið ábótavant og núverandi meirihluti í bæjarstjórn lagt ríka áherslu á að bætt verði úr. Landeyjahöfn er og verður mikilvæg samfélaginu í Vestmannaeyjum. Meirihluti þakkar þeim þingmönnum Suðurkjördæmis sem komu að þingályktunartillögu og þeim þingmönnum sem studdu hana, segir í bókun meirihlutans.

Fulltrúi Sjálfstæðisflokksins fagnar samþykkt þingsályktunartillögu um úttekt á Landeyjahöfn og bindur vonir við að með nýrri ferju og bættum skilyrðum í Landeyjahöfn haldi höfnin áfram að vera sú samgöngubylting sem hún hefur verið samfélaginu og þakkar þingheimi samþykkt hennar.