Bæjarstjórn hefur samþykkt fjárhagsáætlun fyrir árið 2020

Eyjafréttir
·
Fréttir
·
6. desember 2019

Í áætluninnni er gert ráð fyrir jákvæðri rekstrarafkoma samstæðunnar að fjárhæð 152,8 m.kr. sem er um 5,3% af skatttekjum.

Áætlaðar tekjur á árinu 2020 eru 6.619 m.kr. og hækka um 336 m.kr. frá áætlun 2019. Vegna óvissu í sjávarútvegi eru tekjur varlega áætlaðar og ekki gert ráð fyrir að áætlaðar skatttekjur ársins 2020 verði hærri en raunverulegar skatttekjur þessa árs.

Rekstarútgjöld eru áætluð 6.591,5 m.kr. á árinu 2020. Sem fyrr eru fræðslu- og uppeldismál stærsti útgjaldaliðurinn í áætluninni, eða rúmlega 40% af heildarútgjöldum aðalsjóðs, en aukin áhersla hefur verið á lögð á að efla þennan málaflokk undanfarið ár og verður áfram. Rekstrargjöld aðalsjóðs hækka um 347 m.kr. frá áætlun þessa árs. Skýrist sú hækkun aðallega af launa- og verðlagsspá Hagstofu Íslands sem stuðst var við í áætlanagerðinni og auknum framkvæmdum á næsta ári. Áfram verður gætt aðhalds í rekstri sveitarfélagsins og hagrætt þar sem við verður komið.

Gert er ráð fyrir 1.032 m.kr. til framkvæmda á næsta ári. Þar af vega þyngst framkvæmdir við byggingu nýrrar slökkvistöðvar, íbúðir fyrir fatlaða, sorporkustöðvar, skipalyftukannts og bæjarskrifstofa. Einnig á að hefja hönnun á nýrri viðbyggingu við Hamarsskóla.

Meðal annarra áhersluverkefna má nefna áframhaldandi heilsueflingu eldri borgara (Janusarverkefnið), gerð hreystivallar, uppbyggingu tölvu- og upplýsingatæknimála hjá GRV, átak í aðgengismálum, gerð gönguleiða og merkinga, uppbyggingu á Vigtartorgi og gerð umhverfisstefnu.

Í fjárhagsáætluninni er gert ráð fyrir 11,5 m.kr. til verkefna að frumkvæði einstaklinga, fyrirtækja og félagasamtaka í tengslum við „Viltu hafa áhrif?“. Styrkirnir verða afhentir laugardaginn 7. desember 2019.

Álagningarprósenta útsvars verður óbreytt á næsta ári eða 14,46%. Fasteignaskattur íbúðarhúsnæðis lækkar úr 0,33% í 0,291%. Fasteignaskattur á fyrirtæki lækkar úr 1,65% í 1,55%. Með þessu er tryggt að gríðarleg hækkun á fasteignamati í Vestmannaeyjum leiði ekki til hækkunar á fasteignaskatti íbúðareigenda og eigenda fyrirtækja.

Ákveðið hefur verið að gjaldskrár fyrir þjónustu Vestmannaeyjabæjar (þ.e. aðalsjóðs) hækki ekki milli ára, þ.m.t. leikskólagjöld, gjaldskrá Íþróttamiðstöðvar og sundlaugar, matarskostnaður fyrir börn í grunn- og leikskólum, dagvistargjöld og úttektargjöld. Ákvörðun þessi er í anda lífskjarasamnings verkalýðshreyfingarinnar, atvinnurekenda og stjórnvalda þar sem m.a. er kveðið á um lægri skatta og lægri opinberar álögur til að auka kaupmátt og kjarabætur lágtekjuhópa.

Í áætluninni er gert ráð fyrir að frístundastyrkur að upphæð 35.000 kr. verði í boði fyrir hvert barn á aldrinum 2-18 ára.

Fjárhagsstaða Vestmannaeyjabæjar er sterk. Skuldir eru lágar og langt undir viðmiðunarmörkum sveitarstjórnarlaga. Það eru í raun fá eða nokkur sveitarfélög sem geta státað sér af álíka góðri skuldastöðu.

Í fjárhagsáætlun næsta árs er gert ráð fyrir að áfram verði gætt aðhalds í rekstri, en jafnframt leitast við að þjónusta við bæjarbúa verði eins og best verður á kosið.

Nýjustu fréttir

Ritstjórn

Samfélag í sókn þarf samgöngur sem duga

Aðsend grein

Ábyrgð í verki: Vestmannaeyjabær styður við verðbólgumarkmiðið

Stjórnmál

Bæjarstjórn fundar í dag – samgöngur, lögreglumál og vinnuskólinn á dagskrá

Áhugavert

Framtak Björgunarfélags Vestmannaeyja lagði grunn að Landhelgisgæslu Íslands

Sjávarútvegur

Ísfélagið kemur að nýrri lausn til að verjast laxalúsinni

Goslok

Goslok: dagskrá fimmtudags

Þjóðhátíð

Skráning í Söngvakeppni barna hefst á morgun

Myndband

Ottó N. Þorláksson dreginn til hafnar eftir vélarbilun

Mest lesið

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.

Forðist áfenga drykki daginn fyrir brottför

Forðist djúpsteiktan, brasaðan eða saltan mat daginn fyrir siglingu.

Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.

Forðist mikið koffein. Mikið kaffi er ekki það sem maganum líkar fyrir sjóferð.

Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.

Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

Koffínátín – fæst án lyfseðils

Postafen – fæst án lyfseðils

Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.

Piparminta og te eru einnig gömul húsráð við ferðaveiki.

Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

Minna finnst fyrir hreyfingu og veltingi ef maður er staddur næst miðju bátsins.

Mörgum finnst gott að vera í kulda, t.d.að vera úti á dekki og láta vindinn leika um sig.

Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Nýjustu fréttir

Góð ráð fyrir siglingu

Sjóveiki