Hex Hex Dyeworks með litríka pop-up búð í Safnahúsinu

Eyjafréttir
·
Fréttir
·
23. október 2025

Áhugi á handavinnu breyttist í litríkt ævintýri þegar Ásdís Björk Jónsdóttir og Elfar B. Guðmundsson stofnuðu Hex Hex Dyeworks, sem framleiðir handlitað garn úr völdum efnum. Næsta laugardag opna þau litla pop-up búð í anddyri Safnahússins, þar sem gestir geta kynnt sér garnið og handverkið á bak við það.

Hex Hex Dyeworks er lítið fjölskyldufyrirtæki staðsett á Stokkseyri. Fyrirtækið sérhæfir sig í handlituðu garni sem er innflutt frá Suður-Ameríku, að mestu leyti frá Perú, og leggur áherslu á ábyrgð og umhverfisvitund í framleiðslu.

Verkefnið hófst sem lítið áhugamál, en þróaðist smám saman í fjölbreytt og skapandi fyrirtæki. Ásdís, sem hefur haft mikinn áhuga á handavinnu í fjölda ára, segir prjón hafa verið sína helstu slökun síðustu tíu ár.

„Fyrir mér opnaðist nýr heimur þegar ég uppgötvaði að ég gæti sjálf búið til liti til að prjóna úr,“ segir hún. „Nú gefst fleirum tækifæri til að prófa garnið og njóta litanna.“

Í framleiðslunni er lögð áhersla á ábyrgð og umhverfisvæn vinnubrögð. Garn er valið frá framleiðendum sem huga að velferð dýranna, og reynt er að halda ferlinu eins náttúrulegu og vistvænu og mögulegt er. Hex Hex Dyeworks er rekið af hjónunum Ásdísi og Elfari, sem segja mikla ánægju að fá að deila ástríðu sinni með öðrum.

„Við verðum með litla pop-up búð í anddyri Safnahússins næsta laugardag,“ segja þau. „Þar tökum við á móti öllum sem vilja sjá fallega garnið okkar, spjalla, skoða verkefni – hvort sem þau eru í vinnslu eða tilbúin – og fá ráð eða aðstoð við að finna rétta garnið fyrir sig.“

📍 Pop-up búð Hex Hex Dyeworks
🗓 Laugardagur 25. október
⏰ Kl. 12:00–15:00
📌 Anddyri Safnahússins, Vestmannaeyjum

Nýjustu fréttir

Aðsent

Saltfisksala hjá meistaraflokkum ÍBV

Íþróttir

ÍBV með mikilvægan sigur á ÍR

Fréttatilkynning

Kveikjum neistann: Jákvæðar vísbendingar

Aðsend grein

Hvattning til Eyjamanna

Vestmannaeyjabær

Heilsuefling starfsfólks fær aukið vægi

Fortíðarflakk

Handhafar Frétta-píramída 1992-95

Íþróttir

ÍBV sækir ÍR heim

Herjólfur

Siglt til Þorlákshafnar

Mest lesið

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.

Forðist áfenga drykki daginn fyrir brottför

Forðist djúpsteiktan, brasaðan eða saltan mat daginn fyrir siglingu.

Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.

Forðist mikið koffein. Mikið kaffi er ekki það sem maganum líkar fyrir sjóferð.

Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.

Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

Koffínátín – fæst án lyfseðils

Postafen – fæst án lyfseðils

Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.

Piparminta og te eru einnig gömul húsráð við ferðaveiki.

Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

Minna finnst fyrir hreyfingu og veltingi ef maður er staddur næst miðju bátsins.

Mörgum finnst gott að vera í kulda, t.d.að vera úti á dekki og láta vindinn leika um sig.

Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Nýjustu fréttir

Góð ráð fyrir siglingu

Sjóveiki