Framhaldsskólinn í Vestmannaeyjum (FÍV) hefur hlotið sína þriðju viðurkenningu fyrir árið 2025. Í dag var tilkynnt um að skólinn hafi lent í 3. sæti í flokki lítilla ríkisstofnana í könnuninni “Stofnun ársins 2025”. Heildareinkunn skólans var 4,791, sem telst afar góður árangur og staðfestir sterka stöðu hans meðal opinberra vinnustaða.

Niðurstaðan endurspeglar öfluga menningu innan skólans þar sem traust, fagmennska og góð samvinna starfsfólks eru í forgrunni. Slík menning skapar jákvæða umgjörð sem styður nemendur bæði í námi og líðan á hverjum degi og styrkir starfsemi skólans í heild.

Viðurkenningin er – eins og áður segir – sú þriðja sem FÍV hlýtur fyrir árið 2025. Í lok síðasta árs hlaut skólinn Íslensku menntaverðlaunin, auk þess að fá Fréttapýramídann frá Eyjafréttum, sem veittur er fyrir eftirtektarverðan árangur í samfélaginu.

Þessi árangur undirstrikar að markviss uppbygging, jákvæð vinnustaðamenning og metnaður í skólastarfi skila sér – bæði til starfsfólks og nemenda – og staðsetja Framhaldsskólann í Vestmannaeyjum meðal þeirra stofnana sem þykja fyrirmynd á landsvísu. Til hamingju, allir í FÍV.