Bæjarráð Vestmannaeyja hefur falið sviðsstjóra umhverfis- og framkvæmdasviðs að vinna fýsileikakönnun á byggingu sjúkrasundlaugar sem hugsað er sem viðbyggingu við núverandi sundlaugasvæði. Jafnframt verður kostnaður við framkvæmdina metinn.

Tillagan – sem lögð er fram af Hildi Sólveigu Sigurðardóttur, bæjarfulltrúa Sjálfstæðisflokksins – var áður tekin fyrir á fundi bæjarstjórnar sem fól bæjarráði að útfæra framvindu könnunarinnar. Gert er ráð fyrir að könnunin byggi á greinargerð þar sem meðal annars verður horft til byggingarkostnaðar, rekstrar, mögulegra tekna og fjármögnunarleiða, auk þess sem eftirspurn og lýðheilsulegur ávinningur verða metin.

Í greinargerðinni kemur fram að lengi hafi verið rætt um þörf fyrir sjúkralaug í Vestmannaeyjum. Slík laug gæti bætt aðstöðu fyrir sundleikfimi, endurhæfingu og ungbarnasund, þar sem vatnið væri hlýrra og aðbúnaður betur sniðinn að þörfum þeirra sem þurfa á sértækri þjónustu að halda.

Einnig er bent á að sérstök laug gæti dregið úr álagi á núverandi sundlaug og bætt aðgengi almennings, auk þess að nýtast sem varalaug þegar loka þarf stóru lauginni vegna viðhalds eða framkvæmda.

Sund hefur um langt skeið gegnt mikilvægu hlutverki í íþrótta- og heilsulífi Vestmannaeyinga og á næsta ári verða 50 ár liðin frá opnun núverandi sundlaugar. Í tillögunni er því lýst að vel fari á því að hefja alvarlega skoðun á verkefninu á þeim tímamótum.