Vegagerðin hefur auglýst útboð á rekstri áætlunarflugs milli Reykjavíkur og Vestmannaeyja fyrir tímabilið 2026–2029. Flugið gegnir mikilvægu hlutverki í samgöngum við Eyjar, sérstaklega þegar veður hamlar siglingum, en í dag er einungis flogið frá byrjun desember og út febrúar. Að sögn G. Péturs Matthíassonar, upplýsingafulltrúa Vegagerðarinnar, er ekki gert ráð fyrir breytingum á því fyrirkomulagi. „Gert er ráð fyrir áætlunarflugi í þrjá mánuði á ári, eins og verið hefur,“ segir hann.

Samningurinn er til þriggja ára, frá 1. september 2026 til 30. nóvember 2029, með möguleika á framlengingu um allt að tvö ár. Verkefnið felur í sér bæði farþega- og vöruflug, þar sem rekstrarkostnaður verður endurgreiddur að frádregnum tekjum samkvæmt útboðsskilmálum. Fram kemur á vef Vegagerðarinnar að útboðið sé auglýst á Evrópska efnahagssvæðinu.