Nú hefur fulltrúaráð sjálfstæðisfélaganna í Eyjum ákveðið að hafa prófkjör við val á framboðslista XD fyrir kosningar til bæjarstjórnar 16. maí nk. . Eftir ítarlega umfjöllun  varð niðurstaðan án mótatkvæða  að efna til prófkjörs 13. mars nk. En með þeim hætti fær lýðræðið að njóta sín best.  Sjálfstæðismenn í Vestmannaeyjum fá það hlutverk að raða  á  framboðslistann og fagna ég þeirri leið.  Hlaut  1. sæti í rúmlega 900 manna  prófkjöri í mars 2022 og hef verið oddviti okkar Sjálfstæðismanna á því kjörtímabili sem  senn er að líða.  Hef lagt mig fram í bæjarráði og bæjarstjórn að efna þau verkefni sem voru á stefnuskrá  XD fyrir kosningarnar 2022.  

Bæjarfélög á landsbyggðinni eiga undir högg að sækja gagnvart ríkisvaldinu og  mikið  verk að snúa við þeirri þróun. Rekstur grunn- og leikskóla og félagsþjónustan í heild sinni eru mikið metnaðarmál og þar fer fagmennskan með ferðina.  Grunnurinn að velferðinni er öflugt atvinnulíf í Eyjum til lands og sjávar. Samstarf  meirihluta og minnihluta í bæjarstjórn hefur gengið vel á kjörtímabilinu. Eðlilega koma upp ágreiningsmál, en oftast tekist að ná lendingu. Traust og góð samvinna í bæjarstjórn mun skila okkur meiri grósku og öflugri byggð til framtíðar.  

Eftir nokkra umhugsun og hvatningu bæjarbúa hef ég ákveðið að bjóða mig fram til að leiða  D-lista Sjálfstæðisflokksins í Vestmannaeyjum í kosningum til bæjarstjórnar 16. maí nk.

Um leið óska ég eftir stuðningi í 1.sætið í prófkjöri Sjálfstæðismanna sem fer fram föstudaginn 13. mars 2026.

Eyþór Harðarson, bæjarfulltrúi.