Íris Róbertsdóttir, bæjarstjóri Vestmannaeyja, hefur ákveðið að gefa ekki kost á sér á framboðslista hjá bæjarmálafélaginu Fyrir Heimaey í komandi sveitarstjórnarkosningum. Hún greinir frá ákvörðuninni í færslu á samfélagsmiðlum þar sem hún þakkar fyrir traustið síðustu átta ár, rifjar upp árangur kjörtímabilanna og segist stolt af þeim grunni sem lagður hefur verið að áframhaldandi vexti samfélagsins í Eyjum.

Yfirlýsingin í heild sinni:

Kæru vinir

Síðustu átta ár hafa þroskað mig mikið. Þau hafa reynt á en líka veitt mér styrk og mikla gleði. Ómetanleg reynsla situr eftir og nýir vinir og samstarfsfélagar bæst í hópinn.

Í mínum huga er hollt og gott að þeir sem gefa kost á sér í stjórnmál staldri við eftir hvert kjörtímabil. Þegar ég lít til baka er ég mjög ánægð með þann árangur sem við höfum náð. Við höfum skapað ramma til vaxtar fyrir samfélagið og verið með raunverulega áherslu á Vestmannaeyjar sem skólasamfélag. Samstaða er nauðsynleg í hagsmunagæslu gagnvart ríkinu og ég er sérstaklega ánægð með þetta kjörtímabil í þeim efnum. Það góða samstarf sem er í bæjarstjórn og bæjarráði er samfélaginu okkar til heilla í öllum þeim áskorunum sem við mætum.

Að vel athuguðu máli hef ég ákveðið að gefa ekki kost á mér á framboðslista hjá bæjarmálafélaginu Fyrir Heimaey í komandi kosningum og hef ég tilkynnt stjórn félagsins þá niðurstöðu.

Ég er þakklát og auðmjúk fyrir að hafa fengið tækifæri, í umboði félaga minna, til að starfa sem bæjastjóri Vestmannaeyinga, fyrst kvenna. Þegar kjörtímabilinu lýkur í vor mun ég gera upp þessi átta ár og hlakka til að fara yfir það með ykkur í máli og myndum.
Það er mér ómetanlegt að finna þá ánægju sem þið Eyjamenna hafið látið í ljós með störf mín og fram kom meðal annars í Gallup-könnun nýverið. Að geta lokað þessum kafla með Fyrir Heimaey með þetta veganesti gerir mig glaða og stolta.

Takk fyrir traustið, öll samtölin og hvatninguna til áframhaldandi góðra verka; ég met það mikils.

Í vor hefst nýr kafli.

Takk og aftur takk fyrir ykkur.