Endurnýjun á tæknibúnaði sundlaugarinnar í Vestmannaeyjum er á lokametrunum og styttist nú í að nýtt kerfi verði tekið í notkun. Lokafrágangur stendur yfir og stefnt er að því að sundlaugin verði opnuð aftur fyrir almenning þegar prófunum lýkur.

Á vef Vestmannaeyjabæjar segir að vinnu við uppsetningu nýs búnaðar miði vel áfram. Gert er ráð fyrir að rafvirkjar og pípulagningamenn ljúki uppsetningu búnaðar í þessari viku. Í kjölfarið mun fara fram ítarleg prufukeyrsla á öllum kerfum til að tryggja öryggi og að búnaðurinn virki sem skyldi.

Í næstu viku verður tölvustýrt stjórnkerfi sett upp. Kerfið mun sjá um sjálfvirka stýringu á nýju hreinsikerfi og vatnsbúnaði sundlaugarinnar. Þegar prófanir á stjórnkerfinu hafa verið kláraðar verður hafist handa við að fylla laugina. Að því loknu verður sundlaugin opnuð á ný fyrir almenning.

Í tilkynningu Vestmannaeyjabæjar er íbúum þökkuð sýnd biðlund á meðan verkið hefur staðið yfir við þessar mikilvægu endurbætur.