,,Ég vildi að ég gæti kosið fólk en ekki flokka” er setning sem ég hef fengið að heyra óteljandi oft á mínum pólitíska ferli. Margir eiga erfitt með að festa sig við ákveðna stjórnmálaflokka, sér í lagi í sveitarstjórnarmálum þar sem áherslumunurinn er oft ekki jafn áberandi eins og í landsmálunum. Bæjarfulltrúum í Vestmannaeyjum hefur líka borið gæfa til þess amk. svo lengi sem ég hef tekið þátt í pólitík að standa þétt saman þvert á flokka í þeim stóru hagsmunamálum sem við þurfum að beita okkur í gagnvart ríkinu á borð við samgöngur, heilbrigðismál og orkumál.

Nú stendur yfir prófkjör hjá Sjálfstæðisflokknum í Vestmannaeyjum, það er eins nálægt persónukjöri til sveitarstjórna og við komumst. Til þess að taka þátt þarftu að vera 15 ára, með lögheimili í Vestmannaeyjum og að vera skráður í Sjálfstæðisflokkinn en hægt er að skrá sig  á www.xd.is.

Frelsi til að velja

Frelsi og ábyrgð einstaklingsins, mannréttindi og jafnræði, eru hornsteinar stefnu Sjálfstæðisflokksins. Í prófkjöri fá flokksfélagar frelsi til að velja sinn framboðslista, velja þá einstaklinga til forystu sem þeir treysta best til að leiða flokkinn til sigurs í næstu kosningum.

Sjálfstæðisflokkurinn í Vestmannaeyjum er öllum opinn og hvet ég þig eindregið til að taka þátt með okkur í starfinu og óska ég eftir þínum stuðningi í 2. sæti á framboðslista Sjálfstæðisflokksins í Vestmannaeyjum fyrir næstu bæjarstjórnarkosningar.

Hildur Sólveig Sigurðardóttir

Sjúkraþjálfari og bæjarfulltrúi