Sjötti þáttur sýningarraðarinnar “Vestmannaeyjar í gegnum linsu liðins tíma” verður sýndur laugardaginn 28. mars kl. 11.00–12.00 í Sagnheimum. Eins og í fyrri þáttum er mest fjallað um tímabilið 1950-1960, en einnig bregður fyrir eldri og nýrri klippum.

Meðal þess  sem kemur fyrir í þessum þætti eru nýju húsin við Heiðarveg, bygging húsa við Boðaslóð, Hólagötu og í austurbænum. 17. júní skrúðganga, hátíðarhöld á Stakkó og Hásteinshlaupið sem var stór þáttur í dagskránni. Einnig verða myndir af úteyjarlífi og eggjatöku  í Elliðaey o.fl.

Á undan verður stutt kynning á sérstökum þætti sem  verður sýndur laugardaginn í Sjómannadagshelgi   6. Júní nk. tileinkuðum Kristjáni Óskarssyni. Sýndar verða nokkrar kyrrmyndir úr “Heimakletts myndunum” sem Kristján Óskarsson, Sævaldur Elíasson og Áki Heinz Haraldsson heitinn settu inn myndskýringar  af  fólki og húsum í Eyjum. Einnig verða sýndar stuttar klippur úr þremur viðtölum Stjána Óskars við þrjá kunna Eyjamenn þar sem þeir létu ýmislegt flakka.

Líkt og á fyrri sýningum mun Arnar Sigurmundsson greina nánar frá myndefninu og leiða umræður. Gunnar Júlíusson, grafískur hönnuður, yfirfór myndefnið og sá um úrvinnslu verkefnisins, sem hlaut styrk úr Uppbyggingarsjóði Suðurlands.