Herjólfur ohf. hefur tilkynnt að bókunarkerfi félagsins sé komið aftur í fulla virkni eftir bilanir í rétta viku vegna eldsvoða í gagnaveri í Amsterdam þar sem kerfið er hýst..

Fram kemur í tilkynningu að allar bókanir sem borist hafi síðustu daga hafi nú verið færðar inn í kerfið og að farþegar geti aftur bókað ferðir með eðlilegum hætti. Þá þakkar félagið viðskiptavinum sínum fyrir skilning og þolinmæði meðan unnið var að lagfæringum.

Herjólfur siglir sex ferðir til Landeyjahafnar í dag, fimmtudaginn 14. maí. Brottfarir frá Vestmannaeyjum verða klukkan 07:00, 09:30, 12:00, 14:30, 17:00 og 19:30. Frá Landeyjahöfn verður siglt klukkan 08:15, 10:45, 13:15, 15:45, 18:15 og 20:45.

Á föstudag hefur að svo stöddu aðeins verið gefin út áætlun fyrir fyrri hluta dags. Þá verður brottför frá Vestmannaeyjum klukkan 07:00 og 09:30, en frá Landeyjahöfn klukkan 08:15 og 10:45. Nánari upplýsingar um siglingar síðar á föstudeginum verða birtar á föstudagsmorgun.