Hafró leggur til minni þorskkvóta en mikla aukningu í loðnu
Bjart framundan í loðnu en niðurskurður í þorski, ýsu og ufsa.

Ritstjórn

frettir@eyjafrettir.is

Í dag kynnti Hafrannsóknastofnun úttekt á ástandi nytjastofna og ráðgjöf fyrir næsta fiskveiðiár. Lagt er til aflamark fyrir á annan tug stofna á grundvelli langtímamarkmiða íslenskra stjórnvalda um sjálfbæra nýtingu.

 1 % lækkun aflamarks þorsks

Hafrannsóknastofnun ráðleggur 1 % lækkun aflamarks þorsks fiskveiðiárið 2026/2027. Fylgir sú ráðgjöf aflareglu íslenskra stjórnvalda. Ráðlagður heildarafli lækkar úr 203 822 tonnum á yfirstandandi fiskveiðiári í 201 674 tonn. Ekki er gert ráð fyrir að ráðlagður heildarafli þorsks aukist næstu tvö til þrjú árin, en fyrir því eru tvær ástæður. Annars vegar eru árgangar frá 2021 og 2022 metnir undir meðallagi. Þessir árgangar eru nú komnir inn í viðmiðunarstofn þorsks (fjögurra ára og eldri). Hins vegar eru árgangarnir frá 2019 til 2021 hægvaxta sem talið er tengjast minni stofnstærð loðnu undanfarin ár. Því er vænt framlag þeirra árganga í lífmassa viðmiðunarstofns minna en fyrir eldri árganga í sama fjölda.

Samkvæmt aflareglu verður aflamark ýsu 63 206 tonn, sem er 20 % lækkun á ráðgjöf frá yfirstandandi fiskveiðiári. Lækkunin er komin til vegna þess að stærð viðmiðunarstofns ýsu (45 cm og stærri) hefur minnkað frá því að hann náði hámarki árið 2024. Lækkunin kemur í kjölfar minni nýliðunar árin 2022-2024. Því er ekki búist við að stofninn stækki á næsta ári. Vísbendingar eru um að árgangurinn frá 2025 sé stór.

16% lækkun á ráðgjöf fyrir ufsa

Ráðgjöf fyrir ufsa samkvæmt aflareglu lækkar um 16 % frá yfirstandandi fiskveiðiári og er nú 49 887 tonn. Samdráttur í ráðgjöfinni í ár er vegna lækkaðs mats á stærð viðmiðunarstofns ufsa (4 ára og eldri).

Ráðgjöf fyrir gullkarfa er 43 319 tonn eða 5 % hærri en á yfirstandandi fiskveiðiári. Þessa hækkun má að hluta rekja til hærri stofnvísitölu að hausti seinustu þrjú ár samanborið við árin þar á undan. Metin stærð árganga gullkarfa frá árunum 2009 til 2016 er lág og af þeim sökum hefur hrygningarstofn minnkað frá árinu 2018. Vísbendingar eru um aukna nýliðun en ekki er búist við að þeir árgangar skili sér í veiðistofninn fyrr en eftir nokkur ár.

Áfram er lagt til að aflamark djúpkarfa verði 0 tonn þar sem hrygningarstofninn er metinn undir varúðarmörkum. Ekki er búist að stofninn fari yfir varúðarmörk á næstu árum.

Ráðgjöf fyrir grálúðu er nær óbreytt frá fyrra ári, 21 079 tonn. Útlit er fyrir aukningu á stofnstærð á næstu árum vegna aukinnar nýliðunar.

Ráðgjöf um aflamark íslensku sumargotssíldarinnar fyrir komandi fiskveiðiár lækkar um 22 % og er 80 307 tonn. Ástæðan er sú að vægi stórra árganga frá 2017-2019 í viðmiðunarstofni minnkaði frá fyrra ári og því er stofnstærðin metin minni í ár. Ekki er búist við miklum breytingum á stofnstærð á næsta ári. Vandamál tengd bergmálsmælingum árin 2024-2025 leiða til aukinnar óvissu í stofnmati.

Mikil aukning á ráðgjöf fyrir loðnu

Ráðlagt upphafsaflamark fyrir loðnu á komandi vetrarvertíð er samkvæmt aflareglu strandríkja 358 044 tonn, sem er 81 % aukning frá lokaráðgjöf seinasta fiskveiðiárs. Ráðgjöfin fyrir loðnu verður uppfærð fyrir næstu vertíð að lokinni haustmælingu.

Meðfylgjandi tafla sýnir tillögur Hafrannsóknastofnunar um hámarksafla 28 stofna fyrir fiskveiðiárið 2026/2027.

Tillögur um hámarksafla fiskveiðiárið 2026/2027, ásamt tillögum og aflamarki samkvæmt ákvörðun stjórnvalda fyrir fiskveiðiárið 2025/2026 (í tonnum). Einnig er sýnd hlutfallsleg (%) breyting á ráðgjöf milli fiskveiðiára.

Nýjustu fréttir

Fréttatilkynning
Standa þarf vörð um hafrannsóknir
Laxey
Stórseiðahús reist á aðeins tíu mánuðum
Sjávarútvegur
Hafró leggur til minni þorskkvóta en mikla aukningu í loðnu
Aðsend grein
Leiðin liggur á Eyjuna fögru
Áhugavert
Enn að eftir 40 ár sem blaðamaður
Samgöngur
Dýpkun í Landeyjahöfn sett á bið vegna mikillar siglingaumferðar
Áhugavert
Sjómannakaffið – ÍBV-stelpurnar tóku við keflinu
Sjávarútvegur
Landað í Grindavík og í Eyjum
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.