Alls höfðu 341 greitt atkvæði utan kjörfundar í Vestmannaeyjum þegar Eyjafréttir leituðu upplýsinga hjá embætti sýslumanns í morgun.

Á kjörskrá í Vestmannaeyjum fyrir þjóðaratkvæðagreiðsluna laugardaginn 29. ágúst eru 3.170 manns. Því hafa nú um 10,8% kjósenda í Eyjum þegar nýtt sér utankjörfundaratkvæðagreiðslu.

Til samanburðar voru 3.538 á kjörskrá í bæjarstjórnarkosningunum í maí. Kjósendum fækkar því um 368 milli kosninga. Að sögn Ólafs Elíssonar, fulltrúa í yfirkjörstjórn í Vestmannaeyjum, liggur munurinn einkum í erlendum ríkisborgurum og Íslendingum búsettum erlendis sem höfðu kosningarétt í sveitarstjórnarkosningunum en ekki í komandi þjóðaratkvæðagreiðslu.