Hámarksafli íslenskra skipa á loðnuvertíðinni framundan er 139.205 tonn, en þar af eru 7.378 dregin frá til atvinnu- og byggðaráðstafana, þannig að úthlutun ársins er 131.827 tonn. Þetta kemur fram í reglugerð um loðnuveiðar íslenskra skipa sem matvælaráðuneytið birti í lok október.

Sem fyrr er úthlutunin byggð á ráðgjöf Hafrannsóknastofnunar sem lagði til að loðnuafli ársins verði ekki meiri en 218.400 tonn. Mismunurinn, tæp 80 þúsund tonn, kemur í hlut annarra þjóða sem samið hafa um sinn hlut.

Stærstur hluti íslenska kvótans, samtals tæp 60 þúsund tonn, kemur í hlut fimm skipa. Heimaey VE, Venus NS og Vilhelm Þorsteinsson EA fá rúm 12 þúsund tonn hvert, og Börkur NK og Beitir NK fá rúm 10.500 tonn hvort.

Reikna má með því að veiðiheimildirnar annað hvort aukist eða minnki að lokinni loðnuleit í janúar, þegar endanleg ráðgjöf liggur fyrir frá Hafrannsóknastofnun.