Tói Vídó sendi ritstjórn Eyjafrétta póst þar sem hann deilir áhyggjum sínum yfir umgengni inn á Eiði og spyr hvort ekki sé hægt að ráða bót á umgengninni. „Málið er það að oft fer ég í göngutúra um okkar fallegu eyju sem er yndisleg. En það er sérstaklega einn staður sem fer alveg svakalega í taugarnar á mér vegna ógeðslegrar umgengni og sóðaskap en það er svæðið úti á Eiði. Ég fór upp á Klif þann 29.04.2012 í fallegu veðri og útsýnið var stórkostlegt sjá yfir fallega bæinn okkar fyllti mig af góðum tilfinningum. En svo fór ég að horfa á stoltið okkar Vestmannaeyinga, það er að segja Heimaklett en þá var nú annað sem helltist yfir mig. Það var undrun, hneyksli og eitthvað af reiði. Því það sem við mér blasti var bara alls ekki fallegt, nema þá Heimaklettur,“ skrifar Tói.