Allar hækkanir yrðu samræmdar
12. mars, 2024
HS_veitur_24_20240226_144125
Starfsstöð HS Veitna í Eyjum. Eyjar.net/TMS

Bæjarbúar í Eyjum eru nú að fá fyrstu reikninga ársins frá HS Veitum. Síðasta hækkun fyrirtækisins tók gildi um síðustu áramót og finna notendur verulega fyrir því.

Málið hefur komið til umræðu á samfélagsmiðlum þar sem Eyjamenn lýsa miklum hækkunum á vatninu.

Í þeirri umræðu kemur fram að til eigi að vera samningur milli HS Veitna og Vestmannaeyjabæjar þar sem tekið er fram að verðið til Eyjamanna eigi að miðast við sömu gjaldskrá og Reykjaness, hvorki minna né meira. Þessi samningur er enn í gildi, og er sett fram spurning hvort bæjarbúar í Eyjum eigi þá ekki inneign hjá HS Veitum því búið sé að borga miklu meira en notendur á Reykjanesi hafa greitt undafarin ár.

Eyjar.net leitaði til Kára Bjarnasonar, forstöðumanns Safnahúss Vestmannaeyja vegna málsins, en vitnað var til orða hans á sama spjallþræði.

„Ég get ekki staðfest þessi ummæli sem þarna koma fram um sömu gjaldskrá hér og á Reykjanesi. Hins vegar get ég sagt það sem allir vita að Vestmannaeyjabær seldi Bæjarveitur Vestmannaeyja til Hitaveitu Suðurnesja og eins og gildir um samninga af þessu tagi þá eru þeir vitaskuld vistaðir á skjalasafni okkar.“ segir Kári og bætir við:

„Allar hækkanir/lækkanir á gjaldskrá nýs fyrirtækis verða samræmdar“

„Kaupsamningurinn er undirritaður 11. janúar 2002. Það sem vitnað er til þarna er það sem ég hef nefnt við fáeina vini mína sem er að sem fylgiskjal við kaupsamninginn er skjal sem ber heitið „Efnisatriði í væntanlegu samkomulagi um sameiningu Hitaveitu Suðurnesja hf. og Bæjarveitna Vestmannaeyja.“

Í fyrsta kafla þess fylgiskjals (3. liður) er vikið að gjaldskrármálum hitaveitunnar þessum orðum:

„Allar hækkanir/lækkanir á gjaldskrá nýs fyrirtækis (aðrar en lækkun vegna orkuöflunar) verða samræmdar þannig að ef breyta þarf verði á einu veitusvæði nær sú breyting einnig til allra.“

„Annarra að dæma um það hvað þessi orð nákvæmlega þýða“

„Það er annarra að dæma um það hvað þessi orð nákvæmlega þýða. Hlutverk okkar í Safnahúsinu er eingöngu að varðveita þessi skjöl. Til þess að reyna að komast að hvað menn nákvæmlega meintu með þessum orðum bendi ég á að Guðjón Hjörleifsson, þáverandi bæjarstjóri ritaði undir kaupsamninginn“, sagði Kári að lokum.

Eyjar.net heldur áfram umfjöllun um hækkanir HS Veitna á notendur í Eyjum á næstunni.

https://eyjar.net/rumlega-30-haekkun/

https://eyjar.net/segir-orkumalin-i-olestri/

Tengdar fréttir

Mest lesið
viðburðir
Fylgstu með

Skráðu þig á fáðu nýjustu tilkynningar fyrst