Stofnmæling botnfiska að haustlagi, sem jafnan er kölluð haustrall, hófst 29. september síðastliðinn og er nú um það bil hálfnuð. Þetta kemur fram í umfjöllun á vef Hafrannsóknastofnunar.

Tvö skip taka þátt í rannsókninni, togarinn Breki VE-61 og rannsóknaskipið Árni Friðriksson HF-200. Breki annast sýnatöku á grunnslóð en Árni Friðriksson á djúpslóð, þar sem dýpstu togstöðvarnar eru á allt að 1.400 metra dýpi.

Haustrallið hefur farið fram árlega með sambærilegum hætti frá árinu 1996. Eitt helsta markmið þess er að styrkja stofnstærðarmat helstu nytjastofna botnfiska á Íslandsmiðum. Rannsóknin er jafnframt mikilvæg viðbót við vorrall stofnunarinnar, sem fer fram síðla vetrar ár hvert.

Sérstök áhersla á djúpsjávarfiska

Í haustrallinu er lögð sérstök áhersla á rannsóknir á grálúðu, djúpkarfa og öðrum djúpsjávarfiskum. Útbreiðslusvæði margra þessara tegunda ná út fyrir rannsóknasvæði vorrallsins.

Auk upplýsinga um stofnstærð og útbreiðslu fisktegunda er safnað gögnum um meðal annars sjávarhita, tegundasamsetningu, fæðu fiska og botndýr. Gagnasöfnunin er því einnig mikilvægur þáttur í langtímavöktun lífríkis á íslensku hafsvæði.

Rusl í afla hefur verið skráð með kerfisbundnum hætti í um áratug og veita þær upplýsingar innsýn í útbreiðslu rusls á hafsbotni.

Fyrstu niðurstöður væntanlegar í desember

Alls taka tíu vísindamenn þátt í leiðangrinum, auk áhafna skipanna tveggja. Hægt er að fylgjast með ferðum þeirra og sjá staðsetningu togstöðva á skip.hafro.is.

Gert er ráð fyrir að fyrstu niðurstöður verði aðgengilegar í byrjun desember, þegar frumúrvinnslu gagna lýkur. Þær verða birtar á gagnasíðu stofnmælinga Hafrannsóknastofnunar.