Elliði Vignisson, bæjarstjóri, stað­festi í samtali við Fréttir að Vest­mannaeyjabær sé að leita að skipi sem getur þjónustað Vestmanna­eyjar um Landeyjahöfn, ef til þess kemur að Herjólfur verði látinn sigla til Þorlákshafnar næsta vetur. Leitin er á frumstigi en nokkur skip hafa komið upp á borðið. „Við ákváðum að kanna þessa leið þegar fyrir lá að til skoðunar er að Herjólfur sigli í Þorlákshöfn í vetur. Við getum ekki beðið og horft á tækifærin tekin af okkur með því að svipta okkur samgönguleið sem sýnt hefur að er alger bylting fyrir samfélagið,“ sagði Elliði.