Á tímamótum eins og þessum er eðlilegt að líta yfir farinn veg og horfa til framtíðar. Eyjafréttir er miðill sem staðið hefur af sér stórsjó og áföll sem og fengið að blómstra og átt sitt blómaskeið. Það má samt segja að miðillinn hefði aldrei náð 50 ára aldri öðruvísi en að vera með Vestmannaeyjar þetta öfluga samfélag sem sitt helsta umfjöllunarefni. Það furða sig margir á því hvernig hægt sé að reka miðil í tæplega 5000 manna samfélagi sem gefur út blað jafn reglulega og raunin hefur verið í gegnum tíðina. Slíkt er í raun einsdæmi þó víða væri leitað. Ástæðan er einföld Vestmannaeyjar eru Ísland á sterum, öflugt samfélag sem hefur ofurkraft. 

Miðillinn styrkist

Nýverið fengum við liðsauka þegar Tryggvi Már Sæmundsson ritstjóri og eigandi eyjar.net kom til liðs við okkur, þar bættust 10 ár við árin 50 og höldum við því í raun upp á 60 ára afmæli á árinu. Nú er unnið að því að sameina þessar öflugu vefsíður eyjafréttir og eyjar.net í eina enn öflugri síðu sem mun fjalla af krafti og dýpt um samfélagið í Eyjum. Landslagið hefur breyst hratt á stuttum tíma, til að takast á við nýja tíma þarf að aðlaga sig. Í náinni framtíð er stefnt á að bjóða áskrifendum okkar upp á betri þjónustu og með öflugri vefmiðli verður hægt að bjóða áskrifendum upp á nýtt efni sem verður eingöngu í boði fyrir þá. Við teljum slíkt skref styrkja miðilinn til lengri tíma. Einnig er stefnt að því að gefa út stærri blöð sem gefa tækifæri til að fjalla betur um ákveðin málefni, til þess að slíkt sé hægt þá þarf að gefa sér lengri tíma milli útgáfudaga. Atvinnulífið hefur líklega aldrei verið eins fjölbreytt og öflugt og býður það upp á spennandi vinkla, menningarviðburðir, hátíðir og fleira sem Vestmannaeyjar hafa upp á að bjóða gefa oft tilefni fyrir efnismikil blöð, þess vegna teljum við þetta skref vera mikilvægt til að styrkja miðilinn bæði rekstrarlega og efnislega. 

Afmælisráðstefna

Hallað hefur undan fæti hjá fjölmiðlum og þá er í raun alveg sama hvert er litið: Héraðsfréttamiðlar um allt land hafa lagt upp laupana, stór blöð eins og Fréttablaðið hafa hætt útgáfu, N4 og svo mætti lengi telja. Þess vegna þótti stjórn og starfsmönnum Eyjasýnar vel við hæfi á þessum tímamótum að halda fjölmiðlaráðstefnu þar sem héraðsmiðlar koma saman, bera saman bækur og ræða málin. Við erum svo heppin að áhuginn er mikill og við höfum fengið áhugaverða aðila til að vera með erindi og mæta á svæðið, Lilja Alfreðsdóttir ráðherra málaflokksins mætir á svæðið, eldri starfsmenn Eyjasýnar, Páll Magnússon, Gísli Valtýsson, ristjórar héraðsmiðla og fleiri stór nöfn úr fjölmiðlaheiminum koma til okkar. Allt undir dyggri stjórn Ómars Garðarssonar ritstjóra Eyjafrétta. Ráðstefnan verður á sunnudaginn á Goslokahelgi í Þekkingarsetrinu og hvetjum við alla velunara að mæta. 

Ómetanlegt framlag til samfélagsins

Áður en ég tók að mér það skemmtilega verkefni að leggja Eyjafréttum lið gerði ég mér ekki nægilega vel grein fyrir því hversu mikið sögulegt gildi miðillinn hefur fyrir samfélagið okkar. Einnig gerði ég mér ekki nægilega vel grein fyrir því hversu mikilvægt það er að geta átt góða blaðamenn sem geta fjallað af fagmennsku um atvinnulífið, pólitíkina og menningu þá með útskýringum, spurningum og viðtölum, gefa málefnunum gaum sem skiptir oft svo miklu máli til að fólk skilji betur samfélagið geti tekið upplýstari ákvarðanir. Ég vil nota tækifærið og þakka öllum þeim sem unnið hafa við útgáfu Eyjafrétta á einn eða annan hátt undanfarin 50 ár kærlega fyrir þeirra framlag í að gefa samfélaginu í Eyjum gaum og fjalla um líðandi stund, það er svo dýrmætt að eiga þessar heimildir. Miðillinn væri auðvitað ekki til án áskrifenda, auglýsenda og eiganda sem hafa staðið með miðlinum í gegnum súrt og sætt. Ég finn fyrir miklum velvilja í garð miðilsins og það vil ég meina að sé fyrst og fremst vegna sögu miðilsins sem einn rótgrónasti landsbyggðarmiðill landsins. 

Trausti Hjaltason 

Stjórnarformaður Eyjasýnar